Bulshada ku nool gobolka Shabeelaha Hoose ayaa waxaa soo food saartay cabsi ku aadan fatahaad uu webiga Shabeelle ka geystay tuulo hoos tegta Degmada Mahadaay ee gobolkaasi, halkaasi oo ay isaga qaxeen dad fara badan.
Biyaha webiga ayaa gudaha u galay tuulada uu fatahaaddu ka geystay, waxaana ku dhawaad 200 qoys ay isaga barakaceen guryahooda, kuwaasi oo dalbaday in loo fidiyo gurmad beni’aadannimo oo dhinac waliba leh.
Sidoo kale Tuulooyinka qaar ayaa waxaa ka jirta cabsi xoogan oo ku aadan in biyaha webiga uu fatahaad sameeyo, waxaana dadka ku nool tuulooyinka hoos yimaada degmada Jowhar ay wadaan dadaallo ku aadan sidii biyo xireenno loo sameyn lahaa, iyagoo kaashanaya maamulkooda.
Dhinaca kale Bulshada ku dhaqan magaalada Beledweyne ee xarunta gobolka Hiiraan ayaa waxaa dhankooda soo wajahday cabsi tan lamid ah oo ku aadan in Webiga uu jabsado, isla markaana uu fatahaad ka geysto xaaafado ka tirsan magaalada Beladweyne ee xarunta gobolka Hiiraan, sida uu ku soo waramay Wariyaha Warbaahinta Qaranka ee Gobolkaasi Cabdishakuur.
