Munaasabad shahaadooyin lagu gudoonsinayay ku dhawaad 25 arday dhameeysatay heerka koowaad ee Jamacada Salaam faraceda Guriceel ayaa lagu qabtay isla magaalada Guriceel.
Munaasabadaan oo ahayd mid si heer sare ah loo soo agaasimay waxaa ka soo qeyb galay Maamulka degmada, kan gobolka Galgaduud, Xildhibaan Jawaahir Axmed Cilmi, golaha fulinta Ahlusunna Waljamaaca, Maamulka Jaamacadda, arday iyo dadweyne aad ufarabadan.
Ugu horeyn waxaa ka hadlay madasha maamulka Jamacadda Salaam oo ka hadlay heerarkii kala duwanaa ee ay ardaydu soo martay, iyagoo ardayda shahaadooyinka la guddoonsiinayo ku bogaadiyay in waxyaabaha ay barteen ugu adeegaan bulshadooda.
Sidoo kale waxaa halkaasi kahadlay guddoomiyaha degmada Guriceel Cismaan Ciise Nuur {Taardhuleed} oo ardayda dhameysatay heerka koowaad ee Jaamacadda ugu hambalyeeyay guusha ay gaareen, kuna booriyay inay sii kordhiyaan barashada culuumta kala duwan ee Jaamacadda laga barto.
Gudoomiyaha golaha fulinta ASWJ Maxamed Axmed “Macalin Alif” oo halkaasi ka hadlay ayaa ku amaanay Jamacadda Salaam dadaalka ay bulshada u hayso, waxaana uu Madaxda Jaamacadda ka codsaday in ay sare u qaadaan tacliinta sare ee dalka.
Gudoomiyaha gobolka Galgaduud Mudane Xuseen Cali Wehliye Cirfo oo isna munaasabadda hadal ka jeediyay ayaa sheegay in maamulka Gobolka iyo kan Jaamacadda Salaam ay sharaf u tahay in dufcaddii kowaad ay Jaamacaddu ka aflaxaan, isagoo intaa ku daray in maamulkiisu uu dhiiri gelinayo sare u qaadida waxbarashada.
Xildhibaan Jawaahir Axmed Cilmi oo soo xirtay xafladda ayaa kula dar daartay ardayda nasiibka u helay inay gabo gabeeyaan heerka koowaad ee Jaamacadda in ay ugu adeegaan bulshada.
