Kulankan oo ay si wadajir ah u soo qaban qaabiyeen Xafiiska Madaxweynaha JFS u qaabilsan arrimaha muhaajiriinta iyo Machadka Bariga Afrika ee Nabadda loogana hadlayay sidii xal waara loogu heli lahaa dhibaatooyinka tahriibka iyo in fursado shaqo abuur ah loo sameeyo dhallinta tahriibka laga soo celiyo ayaa waxaa ka qeybgalay Safiirka Soomaaliya ee dalka Kenya Danjire Jabriil Ibraahim Cabdulle, Ergeyga gaarka ah ee Madaxweynaha JFS u qaabilsan Arrimaha Hijrada, Soo galootiga iyo xaquuqda carruurta Marwo Maryan Yaasiin Xaaji Yuusuf, Anwar Cabdifataax Bashiir Madaxa fulinta Machadka bariga Afrika ee Nabadda iyo dowlad wanaagga, qaar ka mid ah wakiilada Hay’adaha Caalamiga ah, quburo, aqoonyahano iyo xubno kale oo madasha lagu casuumay.
Danjire Jabriil Ibraahim Cabdulle Danjiraha Dowladda Soomaaliya ee dalka Kenya oo daah-furay shirka ayaa xusay in loo baahanyahay in si wadajir looga qeybqaato waxkaqabashada dhibaatooyinka ka dhasha tahriibka.
Shirka ayaa hal-ku-dheggiisu ahaa “Sugidda Xalka Waara ee Socdaalka ama dadka tahriiba ee Soomaaliya”. Shirkaan ayaa ku soo beegmaya xili loo baahnaa kuna soo aaday xilli ay Dowlada Soomaaliya ka shaqeynayso barnaamijyo iyo qorshooyin wax looga qabanayo arimaha quseeya tahriibka.
Danjire Jabriil oo ka hadlay furitaanka shirka ayaa yiri “Waxaa xusid mudan, Soomaaliya waxay dhistay xafiis u gaar ah socdaalka, soo laabashada, iyo xuquuqda carruurta, taasoo calaamad u ah tillaabada muhiimka ah ee loo qaaday dhanka habeynta maamulka socdaalka”
Danjiraha ayaa ku daray “Wadashaqeyntaani waxay ka tarjumeysaa ka go’naanshaha iyo rabitaanka ay Soomaaliya ka go’an tahay in xal waara loo helo dhibaatooyinka ka dhasha Tahriibka”.
Shirka ayaa inta uu socday Prof soradii ka qeybgalay waxaa ay ku soo bandhigeen Cilmi baarisyo laga sameeyay dhibaatada haysata dadka tahriibka ka soo laabta iyo Hanaanka wax looga qaban karo.
Ergeyga gaarka ah ee Madaxweynaha JFS u qaabilsan Arrimaha Hijrada, Soo galootiga iyo xaquuqda carruurta Marwo Maryan Yaasiin Xaaji Yuusuf oo kulanka soo xirtay ayaa tilmaamtay in aragtida cilmi-baarista lagu soo bandhigay madasha ay tixgelin gaar ah siin doonto.
