Wasaaradda Caafimaadka Galmudug ayaa magaalada Dhuusamareeb ka furtay shirka qiimeynta adeegyada Caafimaadka iyo Wadashaqeynta Wasaaradda iyo Hey’adaha ka shaqeeya Caafimaadka ee sanadka dhamaanaya 2021 iyo qorsheynta Shaqada, wadashaqeynta iyo isla xisaabtanka ee sanadka dhalanaya 2022-ka
Shirkaan oo uu si rasmi ah uu u furay Wasiirka Wasaaradda Caafimaadka Galmudug Dr. Cabdiweli Cabdullaahi Jamac, ayaa waxaa ka qayb galay Wasiirka Wasaaradda Gargaarka Galmudug Mudane Cabdiraxman Maxamed Diiriye (Makaawi), Agaasimaha Guud ee Wasaaradda Caafimaadka Dr. Cabdiwali Maxamed Axmed, Mas’uuliyiin ka socotay Wasaaradda Caafimaadka Galmudug qaybaheeda kala duwan, Hey’adaha Qaramada Midoobay gaar ahaan UNICEF, WFP, WHO, UNOCHA, Hey’adaha ka shaqeeya Caafimaadka Galmudug iyo qayba kale.
Shirkaan oo socon doona Labada maalin ee soo aadan ayaa waxaa ka soo bixi doona qodobo ay ka mid yihiin waxa qabsoomey sanadkan, waxa aan qabsoomin, qaladaadka dhacay ee u baahan in la saxo, waxyaabaha mudan in la joogteeyo, qorsheynta wax qabadyada sanadka soo socda iyo Qaabka loo hormarinayo wada shaqeynta Wasaaradda iyo Hey’adaha kale ee caalamiga ah.
Dr. Cabdiwali Maxamed Axmed Agaasimaha Guud ee Wasaaradda Caafimaadka Galmudug ayaa xusay inay la imaan doonaan qorshe howled cad oo ku qeexan waxyaabaha u qabsoomay iyo waxa ay hiigsanayaan.
Cabdiraxmaan Maxamed Diiriye Wasiirka Gargaarka iyo Dr. Cabdiweli Cabdulaahi Jaamac Wasiirka Caafimaadka Galmudug ayaa ugu dambeyn u jeediyay hey’addaha gargaarka in waajibaadka saaran ay u gutaan sida ugu hufan, lana xoojiyo wada shaqeynta ka dhexeyso Galmudug iyo hay’adaha caalamiga ah.
