Shirkii looga hadlayay maal-gashiga Soomaaliya iyo sidii kor loogu qaadi lahaa ganacsiga soomaaliya oo mudo sedax maalin ah ka socday magaalada Nairobi ayaa maanta la soo gabagabeeyay.
Shirkan ayaa waxaa soo qabanqaabiyay Shirkadaha ku midoobay Shuraako,iyadoo ay gacan ka geysteen Bangiga aduunka iyo safaarada dowlada Mareykanka ay ku leedahay dalka Kenya,waxaana ka soo qeyb galay in ka badan 300 oo ergo ah oo ka kala socday shirkado iyo ganacsato yar yar oo ka kala yimid Soomaaliya iyo wadamada dibadda.
Mas’uuliyintii soo qaban qaabiyay shirkan looga hadlayay maal-gashiga soomaaliya oo gabagabdii shirka qabtay shir jaraa’id ayaa sheegay in shirkan uu guul ku dhamaaday,islamarkaana laga faa’idi doono waxyaabihii ka soo baxay
Agaasimaha Shirkadaha Shuraako Lee C .Sorensen,C/kariim Jirde goole oo shirkadaha Shuraako u qabilsan Soomaaliya iyo Breeann McCusker oo saafarada Mareykanka ee Kenya u qaabilsan arrimaha Soomaaliya ayaa ka warbixiyay waxyaabihii ka soo baxay shirkan looga hadlayay maal-gashiga Soomaaliya,iyagoo sheegay in ka soo qeyb galayaashii shirka iyo maal-gashayadaashii ay si toos ah u wada hadleen,islamarkaana ay rajeynayaan in wax badan ay ku soo kordhin doonaan ganacsiga.
Mas’uuliyiinta shirkadaha Shuraako oo shirkan soo qabanqaabiyay ayaa sheegay in shirkan uusan noqon doonin kii ugu dambeeyay oo looga hadlayo sidii kor loogu qaadi lahaa ganacsiga Soomaaliya.
