Tababarkaan oo socon doona muddo sadex cisho ah ayaa Wasaaradda Warfaafinta Galmudug ugu qabanaysaa magaalada Dhuusamareeb suxufiyiin ka kala yimid Degmooyinka Galmudug, kaasi oo lagu baran doona inta uu socdo heerarka iyo Anshaxa lagama maarmaanka u ah Saxaafadda.
Madaxa Tababarada Wasaaradda Warfaafinta Galmudug Xasan Cabdiraxmaan ayaa tilmaamay in weriyeyaasha lagu bari doona anshaxa saxaafadda iyo xeerarka kale ee saxaafadda la xiriira.
Wasiir ku-xigeenka Wasaaradda Shaqada iyo Arrimaha Bulshada Galmudug Maxamed Nuur Diini oo ka mid ahaa Wasiirada ka qaybgalay munaasabadda ayaa wariyaasha kula dardaarmay inay wanaagga ka shaqeeyaan si saxana bulshada ugu adeegaan.
Wasiirka Wasaaradda Warfaafinta Dhaqanka iyo Dalxiiska dowlad Goboleedka Galmudug Abshir Cabdi Shiiqow ayaa waxa uu xusay in waxyaabaha halkaan lagu barto ay noqonayaan mid Warbaahin ku hagta hannaan toosan lagana faa’iidaysto.
Maalmaha uu socdo tababarku waxaa ka qaybgalayaashu samayn doonaan doodo iyo kulamo lagu falanqaynayo casharada laga baranayo inta uu tababarka socdo.
