Tababarkan oo ay iska kaashanayaan Wasaaradaha Warfaafinta heer Federaal iyo dowlad goboleedka Hirshabeelle, isla markaana ay ka faa’iideysanayaan 30 gabdhood ayaa waxaa muddada seddexda maalmood ah ee oo uu socon-doono, diiradda lagu saarayaa, kor u qaadidda doorka dumarka ku jira saxaafadda ee maamulka hay’adaha Warbaahinta.
Agaasimaha guud ee Wasaaradda Warfaafinta Hirshabeelle Mudane Yaasiin Xaaji oo soo dhoweeyay ka qeyb galayaasha iyo Macalimiinta ayaa hoosta ka xariiqay in tababarkani muhiim u yahay kor qaadista kaalinta gabdhaha saxaafadda ku jira.
Cabdiraxmaan Maxamed Aadam ( Koronto) Lataliyaha Wasaaradda Warfaafinta, Dhaqanka iyo Dalxiiska Soomaaliya ayaa tilmaamay ahmiyadda tababarkan uu yahay qibrad wadaag iyo muujinta kaalinta wanaagsan ee gabdhaha suxufiyiinta ah ka qaadan karaan horumarinta maamulka Warbaahinta.
Wasiir ku xigeenka Warfaafinta, Dhaqanka iyo Dalxiiska dowlad goboleedka Hirshabeelle Cabdishakuur Cabdullaahi Axmed oo furay tababarka, ayaa u mahadceliyay Wasaaradda Warfaafinta, Dhaqanka iyo Dalxiiska dowladda Federaalka, waxa uuna xusay in ay iska kaashadeen qabashada tababarkan si loo xoojiyo kaalinta gabadha Saxafiyiinta ah ee maamulka hay’adaha Warbaahinta, waxaana uu ka qeyb galayaasha kula dardaarmay in ay ka faa’iidaystaan tababarka una gudbiyaan gabdhaha ay bah wadaagta yihiin si kor loogu qaado doorka haweenka ee Warbaahinta.
