Taliyihii hore ciidanka xoogga dalka Genaraal Daahir Aadan Cilmi( Indha qarshe) oo u waramay warbaahinta qaranka ayaa ka hadlay hawlgalada dalka looga xoraynayo kooxaha khawaariijta,guullaha ciidanka xoogga iyo kuwa dib u xoraynta deegaannadu ka gaareen jiiddaha hore ee dagaalka isagoo bogaadiyey guullaha is daba joogga ah ee sida joogatadda ah u gaarayaan ciidamada xoogga oo kaashanaya kuwa dib u xoraynta deegaannada.
Gen indha qarshe ayaa shacabka Soomaaliyeed ugu baaqay in ay la shaqeeyaan qaybaha kala duwan ee Heya’addaha amniga si guul looga gaaro dagaalka ka dhanka ah kooxaha khawaariijta” qofkastaa waa inuu halkiisa ku noqdaa Boolis,qofkastaa waa inuu halkiisa ku noqdaa Nabadsugid isagoo soo wargelinaya Heya’addaha amniga” ayuu yiri taliyihii hore ciidanka xoogga dalka Soomaaliyeed.
Kooxda khawaariijta ayaa la gaarsiiyey jab xooggan kaas oo ay kala kulmeen hawlgalada aan kala joogsiga lahayn ee ay ku ekeeyeen ciidanka xoogga oo kaashanaya shacabka Soomaaliyeed iyo ciidamada dib u xoraynta deegaanada,gobolada Shabeellaha dhexe,Galmudug,Hiiraan,Galguduud iyo Shabeellaha hoose ayaa khasaarihii ugu badnaa lagu gaarsiiyey kooxda khawaariijta iyadoo laga xorreeyey deegaannadii ugu badnaa oo ay mudo ka badan 10 sanno ku dhibaatayn jireen shacabka Soomaaliyeed.
