Doorashooyinka Golaha Sharcidejinta 4-aad ee Qaranka 26 Maarso 1969:
Dorashooyinkan la qabtay bishii Maarso 1969, waa doorashadii 3-aad uguna dambaysay Soomaliya oo dadweynuhu si toos ah u doorto madaxdiisa iyo wakiilladiisa siyaasadeed, waana doorashadii ugu horreysay oo isku mar la qabto Doorashada xildhibaanada Golaha Shacabka iyo wakiillada Golayaasha Dawladaha Hoose dalka oo dhan, waxaana lagu maamulay Sharciga Lambarkiisu yahya Lr. 13 ee 6 Juun 1968.
Wax-ka-beddeka lagu sameeyey Qodobka 9-aad ee shargigan ayaa soo kordhiyey nidaamka cusub oo tirada kursiga loogu guuleysto iyo shuruudaha musharrixiinta
Arrimaha ugu muhiimsan ee lagu xeeriyey Sharcigan Doorashooyinka:
-
123 xildhibaan ee uu ka koobnaa Golaha Sharcidejinta Qaranka waxaa lagu soo doortay mabda’a doorashada oo ay ragga iyo haweenkuba xaq u leeyihiin codeynta (universal suffrage), waxaana lagu fuliyey nidaamka qofkiiba-hal-cod, (one-man-one-vote system).
-
Muwaadin kasta oo rag iyo haweenba leh, oo ugu yaraan sannadka doorashooyinka la qabanaayo 18 jirsaday waxay leeyihiin xaqqa codeynta. Waxaase shardi ah in miirkiisu u dhan yahya, oo aan lagu ridin xukun ka reebaya inuu xil ka qabto xafiisyada Dawladda, ama xukun looga qaadin xaqqa codeynta ama dembi uu galay awgeed xabsi ku jira.
-
Dhammaan muwaadin xaqqa codeynta oo ugu yaraan 25 jirsaday sanadka doorashada la qabanayo, oo karti u leh wax-akhris iyo far-aqorista ayaa xaq u lahaa in loo dooran karo xubinnimada Golaha Sharcidejinta Qaranka, waxaase ka reebana oo aan Golahan loo dooran karin Shaqaalaha Dawladda Rayadka ah iyo Hay’adaha kale ee Dawladda, iyo Ciidammada Qalabka Sida ama xoogagga u habeysan nidaam ciidan-u-yaal (Paramilitary).
-
Sharcigii doorashooyinka lagu soo dhaqmayey taiyo 1964 waxa lagu soo kordhiyey sharcigan cusub xeeriye waxaa ka mid ah:
-
Sida uu xeeriyey Qodobka 9-aad ee sharciga cusub, nidaamka kuraasta loogu kala badinaayo waxaa laga dhigay in tirada codadka ansaxa ah ee degmada ku codeeyey loo qaybiyo tirada kuraasta ay degmadaas ku leedahay Golaha Shacabka wixii ka soo baxa ayaa u dhigma hal kursi. Saa daraadeed Xisbigii hela tiradii ka soo baxday qaybintaas keliya ayaa kursi ama kuraas heli kara. Xukuumaddu nidaamkan cusub waxay ku sheegtay in looga gol leeyahay si looga hortago laguna yareeyo axzaabta siyaasadeed yaryar ee faraha badan oo samaysma doorashooyinka ka hor hadana haddiiba baaba’a doorashada ka dib.
-
Wuxuu kaloo Qodobka 9-aad xeeriyey in dhammaan shaqaalaha Dawladda ha ahaadeed kuwa rayadka ama Ciidanka Qalabka Sida (CQS) ahba aan Golaha Shacabka loo dooran Karin haddii aanay shaqada dawladda ka istaqaaloon 180 maalmood ka hor maalinta doorashada la qabanayo. Saa daraadeed hawlwadeenno sare oo ka mid ahaa shaqaalaha Dawladda iyo saraakiil badan ee ciidamadda qalabka sida ayaa shaqada ka tagaya oo doontay doorashooyinka. Waxaase xusid mudan in xilligii doorashooyinka 1959 iyo doorashooyinkii la qabta 1964 Gobollada Koofurta Soomaaliya Shaqaalaha Dowladda Rayadka iyo CQS waa lagu dhiirrigelin jiray inay ka qaybgalaan doorashooyinka, waxaana la siin jiray fasax lacag la’aan ah, oo shaqadooda ayey kusoo noqon jireen haddii ay doorashadu ku guuleysan waayaan. Sidaana waxaa looga gol lahaa in shaqaalaha dawladda iyo CQS ay ahaayeen kuwa ugu mutacallimsan oo tayada shuruucda iyo nidaamka sharcidejintaba usoo jiidi kara horumar wax-ku-ool ah, xilalka kale ee xildhibaannimada, oo ay ka mid yihiin la-xisaabtanka xukuumadda iyo mattalaadda shacbigana karti u leh.
-
Arinta kale ee wax-ka-beddelka sharcigan saameeyey waxaa ka mid ahaa iyo curaarti lacagta ee liiska musharrixiinta xisbiga laga qaadi jiray oo horaan ahayd Sh. So. 1.000/- oo la kordhiyey oo laga dhigay Sh.So. 5.000/- – curaartan oo aan loo celinayn xisbigii kursi heli waaya.
Dalka waxaa joqogaraafi ahaan loo qaybiyey 48 degaan-doorasho, oo degmo walba waxaa laga dhigay hal degaan-doorasho. Shan (5) degmo, oo ka mid yihiin Aadan Yabaal, Bender Beyla, Buur Hakaba, Jariiba iyo Zeylac lagama codeyn oo liiskii Musharixiinta SYL keligeed ayaa la qabtay waxaan loo yiqiin “Lista Unica” ama liiska xisbiga keliya musharrixiintiisu ansaxa ah oo codeyn la’aan ku qaatay xisbiga SYL.
Dhacdooyinka kale oo xusid mudan waxaa ka mid ah, sida warbixinta rasmiga ah ay dawladdu sheegtay, waxyeellada cunfigu geystay waxaa ka mid ahaa, in doorashooyinka xilligan ay ku geeriyoodeen dad gaaray 25 qof. Degmooyinka xasillonidarrada iyo cunfigu ku badnaa waxaa ka mid ah Caluula, Iskushuban, Gaalkacyo, Dhuusamareeb, Marka Luuq-Ganaane iyo kuwo kale.
Natiijada Doorashooyinka Golaha Sharcidejinta Qaranka ee 26 Maarso, 1969.
Xilligii doorashooyinka 1969 waxaa codeeyey dadweyne tiradiisu gaartay 879.554. Haddii tirdan la barbardhigo tirada dadweynihii ka qaybgalay codeynta doorashooyinkii Golayaasha Maamullada Dawladaha Hoose ee 1963 oo ahayd in ka badan 1.300.000 ama aan barbardhigno doorashooyinkii 1964 oo ahaa 913.069 waxaa si marag madoonta ah u muuqanaysa in xilliga 1969 hoos u dhac weyn ka jiray dadweynihii ka qaybgalka codeynta doorashooyinkan.
Natiijada doorashooyinka Golaha Sharcidejinta oo muddada xilhayntiisu tahay shan (5) sano waxaa la soo bandhigay 7-da Abriil 1969, waxaana ku dhawaaqay Guddoomiyaha Xafiiska Dhexe ee Doorashooyinka Garsoore G. Marotta-Gigli, oo waagaas ahaa Garsooraha Guddoomiye u aha Maxkamadda Racfaanka Soomaaliya. Waxayna axsaabta siyaasadeed kuraasta u kala heleen sidan:
Wadarta Codadka: 879.554
Tirada Codadka xumaaday: 97.320
Wadarta Codadka ansaxay: 782.234
|
Magaca Xisbiga |
Tirada Codadka Xisbigu helay |
U dhigan boqolkiiba % |
Tirada Kuraasta (123) |
|
Xisbiga Somali Youth League (SYL) |
260,046 |
33.24% |
73 |
|
Xisbiga Somali National Congress (SNC) |
77,339 |
9.89% |
11 |
|
Xisbiga Somali Independent Constitutional Party (HDMS) |
27,681 |
3.54% |
8 |
|
Xisbiga Somali African National Union (SANU) |
42,006 |
5.37% |
6 |
|
Xisbiga Liberal Somali Youth Party (PLGS) |
25,639 |
3.28% |
3 |
|
Xisbiga Somali Democratic Union (SDU) |
46,064 |
5.89% |
2 |
|
Xisbiga Popular Movement for Democratic Action (PMDA) |
42,629 |
5.45% |
2 |
|
Xisbiga Somali Socialist Party (PSS) |
31,058 |
3.97% |
2 |
|
Xisbiga Somali People’s Movement Party (PMPS) |
8,531 |
1.09% |
2 |
|
Xisbiga Revolutionary Socialist Workers’ Party (PRSO) |
16,742 |
2.14% |
1 |
|
Xisbiga Somali National Solidarity Party (PSNS) |
12,269 |
1.57% |
1 |
|
Xisbiga United Somali Party (USP) |
13,942 |
1.78% |
– |
|
Isugeynta codadka axsabta kale heleen |
178,288 |
22.79% |
12 |
La Soco Qeybta 7aad Insha Allah
