Wasiirka Warfaafinta Dhaqanka iyo Dalxiiska XFS Mudane Daa’uud Aweys Jaamac ayaa soo dhoweeyay Xubnaha Wafdiga Reer Jabuuti oo maanta ka soo dagay Garoonka Aadan Cabdulle ee Caalmiga ah ee Magaalada Muqdisho ee Caasimadda Soomaaliya, halkaasoo si diiran loogu soo dhoweeyay.
Wafdiga Dowladda Jabuuti ayaa waxaa horkacaya Wasiirka Dhalinyarada, Hidaha iyo Dhaqanka Jamhuuriyadda Dalka Jabuuti, Marwo Hibo Muumin Casawe oo ay ku wehlinayaan Safiirkii hore ee Soomaaliya u joogay magaalada Muqdisho ahna La taliyaha xagga Dhaqanka ee Madaxweynaha Dowladda Jabuuti Aadan Xasan Aadan, Maxamed Ducaale oo ah Agaasimaha wadamada Carabta ugu Qaabilsan Wasaaradda Arrimaha Dibedda ee Jabuuti iyo Jaamac Maxamed Xasan oo ah Guddoomiyaha Jaamacadda Jabuuti.
Saraakiil ka tirsan Safaaradda Jabuuti ee Soomaaliya ayaa qeyb ka ahaa soo dhoweynta Wafdiga reer Jabuuti oo maanta soo gaaray Muqdisho.
Dowladda Soomaaliya iyo Dowladda Jabuuti ayaa leh xiriir walaalnimo oo soo jireen ah waxaana cilaaqaadkaasi uu soo socday muddo ku dhow nus qarni.
Imaatinka wafdiga Jabuuti oo ay horkacayso wasiirka Dhallinyarada, Hidaha iyo Dhaqanka Jabuuti Marwo Hibo Muumin Casaqe ayaa lagu wadaa in ay kulan la qaadato Wasiirka Warfaafinta Dhaqanka iyo Dalxiiska XFS Mudane Daa’uud Aweys Jaamac iyadoo labada wasaaradood ee labada dal lagu wado in ay ka wadahadlaan iskaashiga iyo Horumarka xagga Iclaamka, Wacyigelinta iyo Dhaqanka.
