Iyadoo dhawaan ay dagaallo qasaare gaystay ay ka dheceen deegaanka Xeraale ee Gobolka Galgaduud, ayaa maamaulka Galmudug waxaa uu wadaa dadaallo ku aadan sidii loo soo afjari lahaa xiisadaasi.
Wafdi isugu jira Wasiiro iyo Xildhibaano katirsan Dowlad Goboleedka Galmudug ayaa gaarey magaalada Xeraale Axadii gelinkii dambe, iyagoo u kuurgalaya saameynta dagaaladii dhawaan ka dhacay halkaasi.
Mas’uuliyiinta ayaa la kulmay qaar kamid ah waxgaradka deegaanka, iyagoo wax laga xukmaado ku tilmaamay dagaalada islamarkaana ku baaqay in shacabka ay dib ugu soo laabtaan guryahooda, dhinacyadii dagaalamayna ay nabadda qaataan.
Wasiirka Arrimaha diinta iyo Awqaafta Dowlad Goboleedka Galmudug oo kamid ahaa xubnaha wafdigaasi uu ka kooban yahay ayaa ka hadlay ujeedka socdaalkooda.
“Waxaan u imaanay halkani in aan u kuurgalno xaaladda deegaanka iyo nolosha shacabka, runtii magaalada way haawanaysa, 2% boqolkiiba oo kaliya ayaa soo laabtay dadka dagaalada ka barakacay, waxaan ugu baaqaynaa shacabka in ay guryahooda ay dib ugu soo laabtaan”, Ayuu yir Wasiir Mursal C/raxmaan.
