Guddi is-ku-dhaf ah oo ka kooban xukuumadda iyo baarlamaanka ayaa maanta u amababxay degmada Beled Xaawo ee gobolka Gedo, si ay usoo ogaadaan xaaladda ka jirta xadka Soomaaliya iyo Kenya.
Wafdigaan ayaa u kuurgalaya Derbi la sheegay in dowladda Kenya ay ka dhisayso xadka ay Soomaaliya la wadaagto iyo waliba warar kale oo sheegaya in dowladda Kenya ay darbigaas soo galisay gudaha dalka Soomaaliya.
Wasiirka gaashaandhigga mudane Cabdulqaadir Cali Diini ayaa hoggaaminaya wafdigaan oo ka kooban wasiiro xukuumadda ka tirsan iyo xildhibaano baarlamaanka ka mid ah, kuwaas oo si gaar ah uga tirsan guddiyada arrimaha dibadda, gudaha iyo gaashaandhigga.
Mudaneyaasha baarlamaanka ayaa dhawaan soo saaray qaraar sugaya in sharci laga dhigo oo ku saabsan arrintaan ka jirta xudduudda Soomaaliya iyo Kenya.
Maamulka degmada Beled Xaawo ayaa dhawaan shaaciyay in dowladda Kenya ay gudaha Soomaaliya soo galinayso darbiga ay ka dhisayso xudduudda, ayagoo burburinaya ama baabi’inaya caalaamadaha xadka ee labada dal.
Wasiirka arrimaha gudaha Soomaaliya ayaa dhawaan warbaahinta dowladda u sheegay in dowladda aysan raalli ka ahayn in dhulka Soomaaliyeed lagu soo xadgudbo.
Sidoo kale xukuumadda iyo baarlamaanka ayaaa ayaa dhawaan isku raacay in guddi xaqiiqo raadin ah oo ka kooban labada gole loo diro xadka si ay usoo ogaadaan waxa ka jira arrintaan.
Dowladda Kenya ayaa horay u sheegatay qeybo ka mid ah badda Soomaaliya, taas oo keentay in Soomaaliya ay dacwad ka dhan ah Kenya u gudbiso maxkamadda caalamiga ah ee Hague.
