Afhayeenka wasaaradda amniga dalka C/kaamil Macalim Shurki, ayaa sheegay in wasaaradu si weyn u soo dhaweynayso qorshaha lagu sugayo amniga iyo xasiloonida magaalada Muqdisho.
Magaalada Muqdisho ayaa labo qeybood loogu qeybiyay ciidanka amniga gaar ahaan nabad sugida iyo booliiska, xaafadaha ku teedsan wadooyinka Wadnaha, Sodonka iyo Warshadaha ayaa ammaankeeda waxaa si buuxda ula wareegay nabad sugida, halka wadada dheer ee Maka-Almukarama ay amnigeeda sugi doonaan booliiska sida uu sheegay afhayeenka.
C/kaamil, ayaa sidoo kale sheegay in howlgalo amniga lagu adkeynaayay ay ciidanka amniga ka sameeyeen degmooyinka gobolka Banaadir kuwaas oo uu ku tilmaamay in ay wax badan kaga duwan yihiin kuwiii hore loo sameyn jirey.
“Howlgalada waa ku guri guri loo baarayo oo la hubanayo guriga iyo dadka degan waxaa ay yihiin, waana kuwo socon doona”, ayuu yiri C/kaamil.
Afhayeenka wasaaradda amniga dalka ayaa dadka heysta hubka sharci darada ay ugu baaqay in ay isa soo diiwaan geliyaan, isagoo ilaalada madaxda ku adkeeyay in ay qeybtooda ka qaadaan xaqiijinta amniga xaafadaha ay degan yihiin.
