Wasaaradda haweenka iyo Horumarinta Xuquuqul Insaanka Dowlad Goboleedka Galmudug ayaa maanta Magaalada Dhuusamareeb ku qabatey kulan ku saabsan isku duwidda ururinta macluumaadka, lagu faafinayo samaynta xogta madasha marwo ee gaarsiinta qoondada haweenka 30%. Waxaana madashan lagu casuumey haween ka socday Ururada bulshada rayadka,Saxaafadda madaxa-banaan, Booliiska iyo Hay’addaha dowlada.
Ka qeyb galayaasha ayaa loo soo bandhigey xogaha iyo macluumaadka Wasaradda u diyaarisay ilaalinta xuquuqda haweenka qeybta ka ah Doorashooyinka, gaar ahaan hannaanka uruurinta macluumaadka ee ku jira Madasha marwo kana kooban mareeg laga daalacan karo xogaha haweenka iyo numberka xiriirka dadwaynaha ee qof kastaa kusoo gudbin karo xadgudubyada haweenka ku dhici kara inta doorashada socoto.
Ubax Xuseen Dhiblaawe, Wasaaradda Haweenka iyo Horumarinta Xuquuqul Insaanka Dowlad Goboleedka Galmudug oo kulankan daah furtay ayaa si gaar ah ugu mahadcelisay hey’adda UNDP oo ay sheegtay in ay kala qeyb qaadaneyso dardar galinta barnaamijkan.
Sidoo kale ka qeyb galayaasha oo si gaar gaar ah u dul istaagey su’aalo la iska waydiiyey sida haweenku u heli karo xuquuqaadkooda mudada doorashada iyo sidii dhammaan qaybaha kulankan ku sugnaa isaga kaah-shan karaan fulinta doorkaasi.
