Wasaaradda Haweenka iyo Xuquuqda Aadanaha ee Xukuumadda Soomaaliya ayaa maanta tababbar u soo xirtay qaar ka mid ah shaqaalaah Wasaaradda iyo xubno kale oo ka kala socday Wasaaradaha dowladda.
Tababbarkan ayaa ujeedkiisu ahaa awoodsiinta habka diyaarinta heshiiska caalamiga ah ee xuquuqda carruurta, iyadoo ay bixinayeen dad aqoon u leh howshaasi, waxaana munaasabaddii xiritaanka ka qeyb galay mas’uuliyiin kala duwan iyo marti sharaf lagu casuumay.
Qaar ka mid ah ka qeyb galayaasha tababbarka ayaa ku booriyay Wasaaradda inay dhimeystirto heshiiskasi, kuwaasi oo xusay in axdigan uu yahay mid caalami ah, isla markaana ay Wasaaradda looga baahanyahay inay dhaqan geliso, maadaama uu xoogga saarayo dhowridda xaquuqda carruurta.
Agaasimaha Guud ee Wasaaradda Haweenka Deeq Suleymaan Yuusuf ayaa sheegay in ka qeyb galayaasha looga baahanyahay sidii ay u diyaarin lahaayeen waajibaadka ka saaran Axdiga xaquuqda carruurta.
“Ujeedka siminaarka waxa uu ahaa sidii loo badbaadin lahaa, loona heli lahaa xaquuqda carruurta, waxaan rabnaa inaan isla eegno saameynta ay nagu yeelan doonto heshiiskasi ay Soomaaliya saxiixday” ayuu yiri Agaasimaha Guud.
Wasaaradda haweenka iyo horumarinta xuquuqda aadanaha ee Xukuumadda Soomaaliya ayaa wadda dadaallo lagu horumarinayo dhameystirka heshiisyada horyaala.
