Wasaaradda kalluumeysiga iyo Khayraadka badda DFS ayaa doon kalluumeysi oo lagu tababarayo kalluumeystada waxaay maanta kala wareegtay hey’adda Qaramada Midoobay u qaabishan Cunnada iyo Beeraha (FAO).
Agaasimaha guud ee wasaaradda kalluumeysiga iyo Khayraadka badda, Maxamuud Sh. Cabdullaahi Cabdiraxmaan, oo doonta kala wareegay FAO ayaa ka mahad celiyay taageerada joogtada ah, waxuuna caddeeyay in doontani oo ah tii ugu horreysay ee wasaaraddu yeelato ay qayb weyn ka qaadaneyso horumarinta xirfadda kalluumeysiga iyo soo nooleynta hannaanka kalluumeyiga dalka.
Doonta ayaa waxaa maamulaya shaqaala ka tirsan wasaaradda kalluumeysiga oo horay loogu tababaray inay tababaraan shaqaalaha iyo iskaashatooyinka.
Agaasimaha Qorsheynta ee wasaaradda Kalluumeysiga Cabdullaahi Cabdi Cadow, oo munaasabadda wareejinta ka hadlay ayaa shaqaalaha loo tababaray inay gacanta ku hayaan doonta kula dardaarmay inay xafidaan si looga faa’iideeyo shacabka Soomaaliyeed.
Doontaan oo cabirkeedu yahay 10.3 mitir oo ay FAO ugu deeqday wasaaradda waxaa sameeyay mashruuca Kaluumeeysiga CCAP oo midawga Yurub uu maal geliyo, waxaana ka faa’iideysanaya waaxda maamulka kalluunka iyo iskaashatooyinka wasaaradda kalluumeysiga si ay u dhisto awoodda shaqaalaha iyo iskaashatooyinka.
Mashruuca kalluumeysiga CCAP oo la billaabay sanadkii 2016 ayaa u jeedada laga lahaa waxay aheyd in lagu xoojiyo qaybta kalluumeysiga dalka iyada oo dhallinyarada loo sameynayo shaqo abuur, la siinayo xirfadaha muhiimka ah iyo qalab ka saacidaya inay noloshooda iyo nolosha qoysaskooda wax ka bedlaan.
Mashruuca oo kaashanaya wasaaradaha kalluumeysiga DFS iyo dowlad gobaleedyada ayaa ku guuleystay in dhallinyaro badan loo tababaro hannaanka kalluumeysiga iyo hababka casriga ah ee loo kalluumaysto, sidoo kalana siiyay doomo ay ku jillaabtaan, arrintaas oo waxbadan kusoo kordhisay xirfadooda, agabkooda iyo waxsoosaarkooda dhinca kalluumeysiga, horumuudna u noqotay inay qayb ka qaataan kobcinta dhaqaalaha dalka.
Doonta ay maanta wasaaraddu la wareegtay ayaa qayb ka ah agabka kalluumeysi oo wax lagu tababaro oo FAO ay ka qaybsisay dalka ayaa qayb ka qaadaneysa horumarinta xirfadda Kalluumeysatada iyo iskaashatooyinka, taas oo qayb ka ah hagaajinta guud ee qeybta kalluumeysiga dalka.
Hay’adda FAO ayaa 24 doonyood oo cabbirkoodu kala yahay 7.5 iyo 8.3 waxay ku wareejisay wasaaraddaha kalluumaysiga dowladda federaalka iyo maamul goboleedyada Hirshabelle, Koonfur Galbeed, Puntland iyo Galmudug sanadkii 2019 iyo billaawga sannadkaan 2020, waxaana loo qaybiyay iskaashatooyinka kalluumaysatada ee xeebaha Soomaaliya.
