Mareykanka ayaa galinkii danbe ee shalay ku dhawaaqay in heshiiska hubka ee ay gaareen Ruushka iyo Kuuriyada Waqooyi, uu xad gudub ku yahay go’aannadii golaha ammaanka ee Qaramada Midoobay ay horay u gaareen.
“Nooc kasta oo iskaashi amni ama heshiis hub ah oo dhexmara Kuuriyada Waqooyi iyo Ruushka waxa hubaal ah in uu ka soo horjeedo go’aanadii taxane ahaa ee golaha ammaanka,” ayuu yiri afhayeenka wasaaradda arrimaha dibadda Maraykanka, Vedant Patel.
Arrinkan ayaa salka ku haya kadib markii isla shalay madaxweynaha Ruushka Vladimir Putin uu ku baaqay inuu xoojinayo iskaashiga kala dhexeeya Pyongyang, isaga oo warqad uu u diray hoggaamiyaha Kuuriyada Waqooyi Kim Jong Un, ku booriyay inay muhiim tahay in la xoojiyo iskaashiga ammni ee ka dhaxeeya labada dal.
Hadalkan ka soo baxay Mareykanka, ayaa ku soo beegmaya xilli Washington ay damacsantahay in Jimcaha soo socda ay marti galiso shir madaxeed u dhexeeya hoggaamiyeyaasha Maraykanka, Kuuriyada Koonfureed iyo Japan, kaas oo ujeedkiisu yahay sidii loo xoojin lahaa iskaashiga Ammni ee saddexda waddan iyo khatarta kaga imaan karto Kuuriyada Waqooyi.
