Wasaaradda Arrimaha Dastuurka ayaa shir wadatashi ah la yeelatay ururada dadka baahiyaha gaarka ah qaba oo ku saabsanaa sidii loo dhageeysan lahaa taladooda ku qotonta dhameeystirka Dastuurka.
Wasiirka Wasaaradda oo ka hadlay shirka ayaa sheegay in Wasaaraddu ku dhiiragelinayso dadka naafada ah in ay ka qaybgalaan Ololaha Geedi-socodka dib u eegista Dastuurka.
“Waxaa tihiin muwaadiniin xaq u leh waxa muwaadiniinta kale xaq u leeyihiin, waxa aan hubin doonnaa in Dastuurka uu noqdo mid idiin daryeela islamarkaana xuquuqihiina tilmaama” ayuu yiri Wasiir Cabdi Xoosh.
Dhanka kale, ka soo qaybgalayaasha ayaa Wasaaradda ugu mahadceliyay sida ay ugu dhiiratay in ay kulankan la qaataan oo ay taladooda dhageystaan, waxa ayna ku dhiirageliyeen Wasiirka iyo dhamaan shaqaalaha Wasaaradda in ay qareen u noqdaan dadka baahiyaha gaarka ah qaba.
Kadib markuu iclaamiyey Wasiir Avv Cabdi Xoosh Olole loogu magacdaray Sheeko Qarameed ayeey Wasaaradda bilawday qabashada kulama wadatashi ah oo dhamaan qaybaha kala duwan ee bulshada la la sameeynayo.
Ugu dambeyn, Wasiirka ayaa ballan qaaday in dhamaan Maamul Goboleedyada dalka la gaarsiin doono kulamadan wadatashiga ah si dadka ay ugu dhiiradaan in taladooda ay uga qaybqaatan ololaha hanaanka dib u eegista Dastuurka oo Wasaaraddu ay ka go’antahay in uu noqdo mid daah-furan.
—–DHAMAAD—–
