Waxa aanu sagootinay Cabdicasiis Afrika, Agaasimihii Radio Muqdisho. Salaatul Janaazadiisa waxa nagu hoggaaminayey Raisal Wasaaraha Jamhuuriyadda Eng. Maxamed Xuseen Rooble.
Geerida Afrika waxay ahayd mid aad ii taabatay. Muddadii aanu wada shaqaynaynay waxan ku bartay dabeecado ay yar yihiin qof kulansaday.
Wuxu ahaa hawl-kar. Radio Muqdisho wuxu gaadhsiiyey meel aanay hore u gaadhin muddo dheer. Waxaanu ka dhigay mid saamayn badan leh oo saaxiibo badan.
Wuxu baarri u ahaa Hooyadiis, mushaharkiisa oo ahaa 700 bil kasta waxa heli jirtay Hooyadiis, markaas bay iyadu u soo celin jirtay qayb kamid ah.
Wuxu ahaa Samafale; weligii iilama iman dan uu isagu leeyahay, wuxu ii keeni jirey qof Soomaaliyeed oo dhib haysato, waxan dhihi jirey adigu Mother Teresa xitaa waad dhaaftay.
Qabiilku lama weynayn; wuxu saaxiib la’ahaa Soomaali oo dhan, dadkana wuu isku waday. Dhammaan dadka uu ii keeno ama igala hadlo ma ahayn dad ku qabiil ah.
Wuxu ahaa Geesi aan gabbasho aqoon, waxan ku naanaysi jirnay bulldozer ama katarabiil oo wuxu lahaa geesinimo xad dhaaf ah oo uu go’aamada adag ee fulinta u baahan ku meel mariyo
Wuxu ahaa suxufi yaqaan shaqadiisa isla markaana Af Soomaaliga aad u yaqaan oo hodan ku ah.
Shalay galab buu i sii macasalaameeyey isaga oo Maanta oo Axad ah u bixi lahaa waddanka India si uu Hooyadiis oo uu aad u jeclaa ugu soo daaweeyo.
Geerida AbdiAziz Afrika warbaahinta dunida iyo ta dalkuba aad bay wax uga qortay, dadkii tacsida i soo gaadhsiiyey waxa iigu saamayn badnaa Safiir kamid ah Waddama aynu saaxiibka dhow nahay oo igu yiri “markii aan geeridiisa maqlay aniga oo og in uu geeryooday baan haddana telefoonkiisii wacay aniga oo rajaynaya in warkaasi been noqdo, laakiin been ma noqon karayn oo aniguba waan ogaa in uu geeryooday AbdiAziz laakiin waan Ka samri waayey”
Ilaahay ha u naxariisto Agaasime Cabdicasiis Afrika. Nabadgalyo Walaal
