Wasiirka Wasaaradda Qoyska iyo Horumarinta Xuquuqul Insaanka XFS, Amb. Khadiija Maxamed Al-Makhzoumi, ayaa maanta xafiiskeeda ku qaabishay Hooyo Safiyo Macalin Cabdulle Cumar, oo ah hooyada dhashay, islamarkaana si weyn ugu soo dadaashay Maxamed Ciise Daahir Yuusuf oo kaalinta 1aad ka galay Imtixaanka Shahaadiga Dugsiyada Sare ee Soomaaliya.
Wasiiradda ayaa ku ammaantay Hooyo Safiyo dadaalka iyo adkeysiga ay muujisay muddadii ay garab taagnayd wiilkeeda, iyadoo tilmaantay in ay tusaale wanaagsan u tahay kartida iyo halganka hooyooyinka Soomaaliyeed. Wasiiraddu waxay sheegtay in Wasaaraddu, iyadoo garowsan doorka muhiimka ah ee hooyooyinka, ay Hooyo Safiyo siisay fursad shaqo laga bilaabo maanta, si ay uga sii shaqeyso horumarinta nolosheeda iyo waxbarashada ubadkeeda.
Wasiiradda ayaa xustay in kulanka ay la yeelatay Hooyo Safiyo iyo wiilkeeda Maxamed Ciise uu ahaa mid si gaar ah u taabtay qalbigeeda, iyadoo si dhow uga dhageysatay taariikhdooda iyo halgankooda nololeed. Hooyo Safiyo iyo wiilkeeda Maxamed Ciise ayaa dhankooda si dareen iyo farxad leh uga mahadceliyey Wasiiradda iyo Wasaaradda Qoyska iyo Horumarinta Xuquuqul Insaanka fursadda shaqo iyo garab istaagga loo muujiyey Hooyada, iyagoo ku tilmaamay tallaabadaas mid dhiirrigelin iyo rajo cusub u abuurtay qoyskooda.
Wasiiradda Khadiija Maxamed Al-Makhzoumi ayaa ugu dambeyn u rajeysay Maxamed Ciise Daahir Yuusuf mustaqbal ifaya iyo guulo waaweyn oo uu ku gaaro waxbarashadiisa, iyadoo sidoo kale hambalyo u dirtay dhammaan ardayda Soomaaliyeed ee ku guuleystay Imtixaanka Shahaadiga Dugsiyada Sare. Waxay carrabka ku adkeysay in guusha ubadku ay tahay mid ka dhalata dadaalka, dulqaadka iyo garab istaagga waalidka, gaar ahaan hooyooyinka Soomaaliyeed.
