Wasiir ku-xigeenka Wasaaradda Xanaanada Xoolaha dhirta iyo daaqa ee Xukuumadda Soomaaliya Mudane Cabdinaasir Maxamed Gaarane oo kormeeray xaruntii xanaanada xoolaha ee gobolka Galgaduud ayaa sheegay in sida ugu dhiqsiyaha badan dib-u-dayactir lagu sameeyn doono.
Wasiir ku-xigeenka Xanaanada Xoolaha ayaa howlo indho indheyn ah ku soo sameeyay xarunta xanaanada xoolaha ee ku taala Gobolka Galgaduud ayaa waxa uu Warbixinno ka dhageystay dadkii gacanta ku hayay, isagoo u jeedka kormeerkiisu ahaa u kuurgelidda xaruntaasi.
Faadumo Jaamac oo ah haweeneyda gacanta ku haysto muddada bur burka kaddib, xarunta, isla markaana iminka ku xanaaneyso xoolo ayaa sheegtay inay diyaar u tahay in xarunta xanaanada xoolaha ay ku wareejiso dowladda, si markale loogu adeego bulshada oo lagu xanaaneeyo xoolaha.
Mudane Cabdinaasir Maxamed Gaarane ayaa sheegay in xaruntii uu booqday ay ka muuqato bur bur ah, una baahan in dib loo howlgeliyo, isagoo uga mahadceliyay dadkii gacanta ku hayay xarunta Xanaanada Xoolaha.
“Wax dayactir iyo dib u habeyn lagu ma sameynin tan iyo bur burkii dalka kaddib, runtii xarumihii lagu xanaaneyn jiray xoolaha laguma fekerin in dib u habeyn lagu sameeyo, balse waxaan qorsheyneynaa in arrintaan aan ka shaqeyno oo aan dib u yagleelno dib u soo nooleeynta xarumaha” ayuu yiri Wasiir ku-xigeenka Xanaanada Xoolaha.
