Wasiirka Amniga Gudaha C/risaaq Cumar Maxamed oo uu wehliyo Taliyaha Ciidamada Booliska Jen, Maxamed Sheekh Xasan Xaamud ayaa xariga ka jiray xarun cusub oo ay yeelanayaan Ciidamada Booliska qeybta Miino baarista.
Koox miino baarayaal ah oo loo tababaray habka miinada loo soo saaro iyo si looga hortago in aysan waxyeelo geysan marka ay qarxinayaan ayaa soo bandhigay dhoolatus ay ku muujinayeen wixii ay barteen.
Taliyaha Ciidamada Booliska Jen, Maxamed Sheekh Xasan Xaamud ayaa sheegay in ciidanka booliska qeybta miino baarista u qaabilsan ay qabteen howlo muhiim ah, isla markaana ay yihiin koox uu ku faano taliska ciidanka booliska, ayna joogteynayaan tababar siinta ciidamada kale ee booliska.
“Kooxdan waa kooxda aan is dhihi karo kooxda ugu horeyso ee booliska Soomaaliyeed oo saddexdii qodob ee aas aasiga ahaa isku heysata, waxaana rajeyneynaa in maalinba qeyb ka mid ah booliska aan u tayeyno, oo qalabkii loo siiyo, oo daryeel ay helaan, waxana kaloo rabaa in aan halkaan amaan uga soo jeediyo taliyaha kooxda Gaashaanle dhexe Cabdikariin oo runtii isagu muujiyay hogaamin wanaagsan, kudayo badan ayay noo leedaya, koox waliba iyo hogaan waliba waxaan laga rabaa inay isku duubnaadaan, isla markaana ay fahmaan waajibaadka looga fadhiyo” ayuu yiri Taliyaha ciidanka booliska.
Wasiirka Amniga gudaha C/risaaq Cumar Maxamed ayaa tilmaamay inay tahay tallaabo lagu farxo sida ay ciidamada u tababaran yihiin, isla markaana ay uga go’an tahay in shacabka ay ka difaacaan qaraxyada.
“Farxad ayay ii tahay in aan idinkala qeyb galo munaasabadan lagu furayo xaruntan cusub, runtii ku timid dadaal badan oo ay saraakiishu ku bixiyeen, runti aad iyo aad ayaan ugu faraxsanahay taliyaha meeshan Cabdikariin uu qabtay, waa wax lagu farxo, waa wax noo noqon karto tusaale fiican, waxaan soo jeedinayaa inay ku daysadaan hay’adah kale ee dowladda” ayuu yiri Wasiirka Amniga gudaha.
Hogaanka cusub ee Ciidamada Booliska ayaa muddooyinkii u dambeeyay waday tallaabooyin uu ku hormarinayo ciidamada iyo isku xirka Ciidamada, waana markii u horeysay ee xarun gaar ah loo furo ciidanka booliska qeybta miino baarista.
