Shirkan oo ah wadatashigii labaad ee ku aadan diyaarinta Manhajka Waciygelinta iyo waxbaridda cod bixiyaha doorashada ayaa maanta ka furmay magaalada caasimada ah ee Muqdisho, waxaana ka qeybgalaya labo maalmood oo uu soconayo wakiilo ka kala socda Warbaahinta, dowlad Goboleedyada iyo qeybaha kala duwan ee bulshada.
Related posts
Furitaanka shirkan ayaa waxaa ka hadlay Xuseen Cabdi Aadan oo ah xubin ka tirsan Guddiga Madaxa Bannaan ee Doorashooyinka Qaranka, isagoo sheegay in wacyigelintu muhiim u tahay qabsoomidda doorasho qof iyo cod ah sanadka 2020, maadaama dalka doorasho axsaab ah ay ugu dambeysay 50-sano kahor, arrintaasina ay ku qasabtay diyaarinta Manhajka wacyigelinta cod-bixiyaha doorashada.
Wasiirka Arrimaha Gudaha, Federaalka iyo Dib u heshiisiinta ee Xukuumada Soomaaliya mudane Cabdi Maxamed Sabriye oo shirkan furay ayaa ka qeyb galayaasha u sheegay in Dowladda Federaalka ah ay ka go’an tahay fududeynta wax walba oo lagama maarmaan ah u ah hirgalinta doorasho qof iyo cod ah sandka 2020.
Wasiir Sabriye waxaa kaloo uu yiri “Madaxda Qaranka oo kaashanaya hay’adaha ay quseyso doorashadu waxa ay xooga saarayaan in dadku helaan wacyigelin doorasho si ay u bartaan xuquuqda ay u leeyihiin inay codeeyaan, iyadoo sidookale la fulinayo heshiiskii ay Beydhabo dhawaan kuwada gaareen Madaxda dowladda Federaalka iyo kuwa dowlad Goboleedyada ee dhinaca doorashooyinka, heshiiskaasi oo qeexayay in Soomalaiya ay qaadatay nuuca doorasho ee ah nidaamka matalaadda isku dheeli tiran”
Guddiga Madaxa Bannaan ee Doorashooyinka Qaranka ayaa ku howlan diyaarinta Manhajka wacyigelinta cod-bxiyaha doorashada, iyadoo la aaminsan yahay in helista manhajkaasi uu lafdhabar u yahay doorashada qof iyo cod ah oo la rajeynayo in sanadka 2020 ay ka qabsoonto Dalka.
