Waxaa maanta lagu soo gabagabeeyay magaalada Garowe shirka Wadatashiga Wasaaradaha caafimaadka Dawladaha xubnaha ka ah dawladda federaalka iyo Wasaaradda caafimaadka Xukuumada Federaalka Soomaliya, kaasi oo ay martigalisay Wasaaradda Caafimaadka Puntland ayaa soconayay saddex maalmood, waxaana intii uu socday dib loogu eegay laguna lafaguray sidii la isku kaashan lahaa loona horumarin lahaa caafimaadka dalka.
Shirka waxaa maanta ku soo biiray hay’addaha caalamiga ah, kuwa wadaniga ah iyo qaar kamid ah macaahidda cilmi baarista Puntland, waxaa sidoo kale qaabka Onlineka ah uga qaybgalay qaar ka mid ah wakiilada wadamada taageera caafimaadka Soomaliya.
Wasiirka caafimaadka Puntland Dr Jamac Faarax Xasan oo xiritaankii shirka ka hadlay ayaa xusay muhiimadda uu lahaa shirkaan iyo in la iskaga xog waraystay qorshayaasha caafimaadka dalka, waxaa sidoo kale wax la iska weydiiyay guulaha la gaaray caqabadaha jiray shirkii kan ka horeeyay ee ka dhacay Muqdisho.
Wasiirka ayaa uga mahadceliyay Wasiirka Caafimaadka Xukuumada Federaalka Soomaaliya Marwo Fowsiyo Abiikar iyo Wasiiiradda dowlad goboleedyada ka soo qaybgalkooda shirka iyo inay wax badan ku darsadeen kana go’antahay sidii si wada jir ah looga wada shaqayn lahaa caafimaadka dalka.
Wasiirka Wasaraadda caafimaadka Xukuumada Federaalka Soomaliya Marwo Fowsiyo Abiikar Nuur oo shirka soo xirtay ayaa dhankeeda xustay muhiimadda shirkaan wadatashiga uu u lahaa dalka iyo shacabka Soomaaliyeed, waxay dhankeeda uga mahadcelisay dadaalkii iyo garab istaagii ay sameeyeen mas’uuliyiinta Wasaaradda iyo siday ugu fududeeyaan in shirkaani u qabsoomay sidii ugu quruxda badnaa.
Wasiirka aya hoosta ka xariiqday in shirkaan uu ka soo baxay qorshe si wadajir ah loogu hogaamin doono, laguna horumarin doono caafimaadka dalka. waxayna hay’addaha caalamiga ah iyo wadamadada ka taageera caafimaadka Soomaaliya fartay inay ugu danbeeyaan Wasaaraddaha caafimaadka ee dalka ka jira baahiyaha ay soo gudbiyaana ay wax kala qabtaan.
Ugu danbeyn waxay sheegtay in shirkaan midka xiga lagu qaban doono Jubballand uuna martigaliyay Wasiirka caafimaadka Jubballand.
