Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr Cali Xaaji Aadan ayaa maanta daahfurey Ololaha Tallaalka Cudurka Dabeysha oo 24 Janaayo ka billowdey dalka kuna eg 28-ka isla bishan aynu ku guda jirno ee Janaayo.
Ololaha Tallaalka Cudurka Dabeysha ayaa si toos ah uga billowdey guud ahaan dalka oo dhan gaar ahaan afar (4) Maamul Goboleed iyo Gobolka Banaadir, taasoo tirooyinka degmooyinka la gaari doono ay tahay 81 degmo, iyadoo sidoo kalena la gaar siin doono Tallaalkaas carruurta shanta (5) sano ka yar oo tiradoodu ay gaareyso labo millyan iyo todobo boqol oo kun ( 2,700,000) Carruur Soomaaliyeed ah.
Wasaaradda Caafimaadka iyo daryeelka bulshada Xukumadda Federaalka Soomaaliya waxay soo jeedisay lana magacaabay Guddiga Qaran ee Tallaalka iyo Dabar goynta Cudurka Dabeysha kaasoo uu Guddoomiye u yahay Ra’iisul Wasaaraha Xukumadda Federaalka Soomaaliya Mudane Xamse Cabdi Barre oo ayna ku jiraan Wasiirka Caafimaadka Federaalka, Wasiirada Caafimaadka ee heer dowlad Goboleed, Guddoomiyaha Gobolka Banaadir, Deeqbixiyaasha iyo Hey’addaha ka shaqeeya arrimaha Tallaalka..
Wasaaradda Caafimaadka iyo Daryeelka Bulshadda Xukuumadda Federaalka Soomaaliya waxaa ka go’an gaarista goob kasta oo ay kaga nool yihiin Carruurta Soomaaliyeed gudaha dalka si ay u helaan adeegga Caafimaaadka Tallaalka taasoo laf dhabar u ah howlaha adeeg bixinta ee loo igmaday Wasaaradda.
