Wasiirka Gaashaandhigga xukuumadda Federaalka Soomaaliya Jeneraal Cabdulqaadir Sheekh Cali Diini ayaa maanta gaaray magaalada Kismaayo waxaana halkaasi si diirran ugu soo dhaweeyay mas’uuliyiin ka tirsan maamulka Jubbaland.
Wafdiga uu hoggaaminyo wasiirka Gaashaandhigga ee maanta gaaray Kismaayo ayaa waxaa ka mid ah xubno isugu jira xildhibaanno, siyaasiyiin iyo waxgarad kala duwan, iyadoo garoonka diyaaradaha Kismaayo uu ku soo dhaweeyay madaxweyne ku xigeenka maamulka Jubbaland Jeneraal Cabdulaahi Sheekh Ismaaciil Fartaag iyo mas’uuliyiin kale oo ka tirsan maamulkaasi.
Ujeedada wafdigaasi uu u tegay magaalada Kismaayo ayaa lagu sheegay ka qeybgalka kulamo dib u heshiisiineed oo halkaasi loogu qabanayo beelaha dega deegaanada hoos yimaada maamulka Jubbaland.
Wasiirka Gaashaandhigga Jeneraal Cabdulqaadir Sheekh Cali Diini ayaa ka mahadceliyay sida wanaagsan ee loogu soo dhaweeyay Kismaayo, isagoo ummadda Soomaaliyeed ugu baaqay iney u midoobaan la dagaallanka kooxda Shabaab oo uu sheegay iney dhibaatooyin xad dhaaf ah ku hayaan shacabka,
“Dowladda Federaalka waxey go’aansatay ney markastaba dadkeeda iyo shacabkeeda la wadaagto dareenka ay qabaan oo ah xag nabadgelyo xag siyaasadeed iyo xag horumarinba sidaasi darteed ayaanu halkan u nimdi inaan ka qeybqaadano xagga horumarinta maanta waqtigan la joogo haddii an la muujin midnimo iyo wadajir ummadda Soomaaliyeed waxaa ku imaaneysa dib u dhac” ayuu yiri wasiirka Gaashaandhigga Jeneraal Diini.
