RADIO MUQDISHO: Wasiirka Gaashaandhigga XFS, Mudane Axmed Macallin Fiqi, ayaa maanta xafiiskiisa ku qaabilay Safiirka Dowladda Talyaaniga ee Soomaaliya, Mudane Pier Dacco Coppi, oo ay weheliyeen saraakiil ka tirsan safaaradda Talyaaniga.
Kulankan ayaa diiradda lagu saaray adkeynta iyo horumarinta iskaashiga dhinaca difaaca iyo amniga ee labada dal, iyadoo si gaar ah loo isla meel dhigay dardargelinta tababarrada iyo qalabaynta Ciidamada Xoogga Dalka Soomaaliyeed.
Related posts
Wasiir Fiqi ayaa si gaar ah u bogaadiyey doorka muhiimka ah ee Dowladda Talyaanigu ka qaadato taageeridda, tayeynta iyo horumarinta awoodda ciidanka Soomaaliya, isagoo ku tilmaamay mid lama huraan u ah dadaallada dowladdu ugu jirto sugidda amniga iyo xasiloonida dalka.
Labada dhinac ayaa sidoo kale isku raacay in la sii ballaariyo xiriirka istaraatiijiga ah ee labada dal, iyadoo xoogga la saarayo iskaashiga dhinaca difaaca, xoojinta awoodda ciidanka iyo la dagaallanka argagixisada.
Ugu dambeyn, Wasiirka Gaashaandhigga ayaa Dowladda Talyaaniga uga mahadceliyey dadaalka joogtada ah iyo garab-istaagga ay la barbar-taagan tahay Soomaaliya, isagoo ku adkeeyay muhiimadda ay leedahay sii joogtaynta iyo xoojinta iskaashigan istaraatiijiga ah si loo xaqiijiyo amni iyo nabad waarta oo gobolka ka dhalata.
