Wasiirka Ganacsiga iyo Warshadaha Xukuumadda Soomaaliya Cabdi Xayir Maareeye ayaa la kulmay Guddiga Dhaqaalaha, Maaliyadda, Ganacsiga, warshadaha, Isgaarsiinta iyo Dalxiiska ee Golaha Aqalka sare, wuxuuna kala hadlay Dhaqaalaha dalka, Siyaasadda Ganacsiga, Hormarka Ganacsatada iyo Waxsoosaarka.
Guddoomiyaha Guddigaasi Senator Cabdi Axmed Dhuxulow ayaa sheegay in kulanka looga hadlay arrimo badan, iyadoo ay si gaara diirada u saareen dhibaatada ka taagan Waxyaabaha dalka la soo galiyo oo aan la xakameyn.
Senatorka ayaa sheegay in Wasaaradda Ganacsiga ay Warbixin ka siisay horumarada Ganacsi iyo Dhaqaale uu dalka ku talaabsaday, wuxuuna xusay inay ogaadeen isbedelo badan in la sameeyay, dalkana uu kasoo gudbay marxalado badan oo adkaa haatana laga wada shaqeynayo sidii dalka loo gaarsiin lahaa in la xoojiyo Kaabayaasha dhaqaalaha.
Wasiirka Ganacsiga iyo Warshadaha Cabdi Xayir Maareeye ayaa sheegay in kulanka ay la yeesheen guddiga uu guul kusoo dhamaaday isla markaana ay isla afgarteen waxyaabo badan oo muhiim u ah Ganacsiga iyo Dhaqaalaha dalka.
Wasiirka ayaa sheegay Warbixinta ay u gudbiyeen Guddiga Aqalka sare inay kaga hadleen Horumarada iyo Caqabadaha jira iyo Qorshaha Dowlada ay wado oo lagu doonayo in waxsoosaarka Soomaaliya suuqyo loo raadiyo
“Guddiga si fiican ayaan iskula garanay waxyaabo badan oo aan ka wada hadalnay, waxaan warbixin ka siinay horumarada hada dowlada wado oo ay ka mid tahay in waxsoosaarka Soomaaliya suuqyo loo raadiyo maadaama mudo 30–sano ah ay yareyd wax dhoofinteena iyo sida Dowlada kaga go’an tahay Horumarinta dhaqaalaha iyo Maalgashiga”.
