Wasiirka Garsoorka iyo Diinta ee dowlad goboleedka Hirshabeelle Mudane Cabdiqaadir Cismaan Cabdisalaan Kheyraat ayaa sheegay inay muhiimtahay in loo gurmado maxaabiista ku xiran xabsiyada Hirshabeelle oo ay ka jirto xaalado adag oo xagga nolosha ah.
Wasiir Kheyraat oo la hadlay Radio Muqdisho ayaa sheegay in dhawaan uu socdaal shaqo ku tegay xabsiyada ku yaalla magaalooyinka Beladweyne iyo Jowhar, kaasi oo u jeedkiisu ahaa u kuurgelidda xaaladaha ay ku suganyihiin maxaabiista halkasi ku xiran, waxaana uu intaa ku daray in xabsiyada aysan helin wax dib u dayactir ah, loona baahanyahay in iminka ay ku sameeyaan dib u habeyn balaaran.
Related posts
“Qolal yar oo ay ku xiranyihiin 25 qof ayaan soo arkay, ma heystaan daryeel caafimaad, maxbuuska haddii uu xanuunsado ma lahan gaadiid lagu geeyo xarumaha caafimaadka, marka waxaan codsaneynaa in gacan nalagu siiyo sidii dib u dhis aan ku sameyn lahayn”ayuu yiri Mudane Cabdiqaadir
Wasiirka Garsoorka iyo Diinta ee dowlad goboleedka Hirshabeelle Mudane Cabdiqaadir Cismaan Cabdisalaan Kheyraat ayaa xusay inay qorsheynayaan sidii maxaabiista loogu heli lahaa adeegyada ay u baahanyihiin, haddii ay ahaan lahayd in la baro farsamada gacanta iyo waxyaabo kale.
Ugu dambeyntii Wasiirka Garsoorka iyo Diinta ee dowlad goboleedka Hirshabeelle Mudane Cabdiqaadir Cismaan Cabdisalaan Kheyraat ayaa hoosta ka xariiqay in Wasaaraddu ay xoogga saareyso sidii bulshada cadaalad loogu adeegi lahaa.
Halkan ka dhageyso Wareysiga Wasiirka
