Wasiirka Howlaha Guud, Dib u dhiska iyo Guryeenta ee Xukuumadda Federaalka Soomaaliya Mudane Xuseen Maxamuud Sheekh Xuseen ayaa Dalka Jordan uga qeyb galaya Kalfadhiga afaraad ee Madasha Wasiirada Carabta ee Guriyeynta iyo Horumarinta Magaalooyinka, (AMFHUD) oo ka furmay caasimadda Jordan ee Cammaan.
Kal-fadhi oo socon doona muddo saddex maalmood ah, ayaa waxaa looga doodi doona arrimo badan oo kamidyihiin xoojinta iskaashiga wadajirka ah ee Carabta ee dhinaca guryeynta iyo horumarinta magaalooyinka, iyo xoojinta iskaashiga hay’adaha gobolka iyo kuwa caalamiga ah oo ay ku jirto Barnaamijka Dejinta Aadanaha ee Qaramada Midoobay.
Related posts
Wasiirka Howlaha Guud, Dib u dhiska iyo Guryeenta ee XFS Mudane Xuseen Maxamuud Sheekh Xuseen oo khudbad dhinacyo badan taabaneysay ka jeediyay shirka ayaa waxa uu Faah-faahiyay shaqooyinkii ugu dambeeyay ee ay wasaaradda ka qabatay dib u dhiska dalka, wuxuuna carabka ku dhuftay in mudooyinkii dambe uu dib u dhiska dalka sameeynayo kubac fiican, isagoo tilmaamay in Muwadiniinta Soomaaliyeed ay si is-daba jooga u wadaan dib dhiska dalka, Wuxuuna xusay inay ka Dowlad ahaan dadaal ugu jiraan sidii dhismayaal casri ah dalka looga hergalin lahaa, si Muwaadiniinta Soomaaliyeed ay u helaan adeegyada Asaasiga ah.
Dhinaca kale Wasiir Xuseen Maxamuud Sheekh Xuseen ayaa tilmaamay in dowladda Soomaaliya oo kaashaneysa Shacabka Soomaaliyeed gaar ahaan shaqaalaha Dowladda ay fuliyeen Olalah is Xilqaan dalkaaga ku dhiso kaasi oo Dib loogu dhisay xaruumo kala duwan oo taariikh fog ku leh dalka.
Wasiirka oo hadalkiisa sii wata ayaa dhinaca kale xusay in dowladda Soomaaliya ay dadaal ugu jirto sidii ay xal ugu heli laheyd barakacayaasha loona yareeyn lahaa fiditaanka xeryaha ay ku noolyihiin Barakacayaasha.
Ugu dabeyntii Wasiirka Howlaha Guud, Dib u dhiska iyo Guryeenta ee XFS Mudane Xuseen Maxamuud Sheekh Xuseen ayaa u mahadceliayay dalalka ku mideysan Jaamacadda Carabta ee ka soo qeybgalay shirweynahan iyo Bankiga Horumarinta Islaamka oo ku amaanay doorkiisa ku aadan maalgelinta mashaariicda kala duwan ee lagu horumarinayo dalalka Jaamacadda Carabta oo ay Soomaaliya xubin fir fircoon ka tahay.
“waxaan Madashan uga codsanayaa dalalka Carabta ee walaalaha ah inay gacan ka geystaan dib u dhiska dalka Soomaaliya, iyagoo maalgelinaya Barnaamijyada waaweyn ee lagu dhisayo kaabayaasha dhaqaalaha, xarumaha adeegga dadweynaha iyo Xarumaha adeegyada dawladda, kuwaas oo gacan ka geysan doona dib-u-soo-nooleynta iyo horumarinta dhaqaalaha Soomaaliyaโ Ayuu Yiri Wasiirka Howlaha Guud iyo Dib-U dhiska Soomaaliya Mudane Xuseen Maxamuud Sheekh Xuseen.
