Wasiirka Amniga Gudaha ee Xukuumadda Federaalka Soomaaliya, Mudane Jeneraal Cabdullaahi Sheekh Ismaaciil (Fartaag), oo ay wehlinayeen Taliyaha Ciidanka Booliska Soomaaliyeed, Sareeye Guuto Asad Cismaan Cabdullaahi, ayaa maanta munaasabad soo dhaweyn ah u sameeyay Wasiirka Arrimaha Gudaha iyo Amniga ee dalka Ciraaq.
Munaasabadda oo si heer sare ah loo agaasimay ayaa ka dhacday xarunta tababarka ciidanka Booliska ee General Kaahiye. Waxaa lagu soo bandhigay muhiimadda ay leedahay iskaashiga amniga iyo tababarrada ciidanka, si loo dardargeliyo dadaallada xoojinta nabadda iyo la dagaallanka argagixisada.
Labada wasiir ayaa isku raacay in la xoojiyo wada shaqeynta dhanka amniga, gaar ahaan tababarka iyo qalabaynta ciidamada Booliska. Wasiirka Ciraaq ayaa sheegay inuu aad ugu faraxsan yahay booqashada iyo soo dhaweynta diirran ee uu kala kulmay mas’uuliyiinta Soomaaliyeed.
