Wasiiru dowlaha wasaarada maaliyadda ee dowlad goboleedka Galmudug, mudane Cabdirisaaq Maxamuud Jaamac ayaa maanta Caasimada Galmudug ee Dhuusamareeb ka furey, barnaamijka wacyigelinta iyo tababarka dowladaha xubnaha ka ah dowlada Federaalka ah ee ka hor tagga lacag dhaqidda iyo la dagaalanka maal gelinta argagaxisada oo ay soo qaban qaabisay Xarunta Warbixinada Maaliyadda ee FRC.
Wakiilo ka kala socda wasaaradaha iyo hay’addaha dowladda Galmudug iyo bulshada rayidka ayaa ka qeybgalaya barnaamijkaan wacgelinta ah, kaas oo socon doona muddo isbuuc ah.
Galmudug ayaa ah dowlad goboleedkii labaad nasiibka u heshay barnaamijka wacyelinta ah kaas loogu gol leeyahay in sare loogu qaado wacyiga iyo awoodaha wasaaradaha iyo hay’addaha ku shaqada leh hawlaha ka-hortagga lacag dhaqidda & la-dagalanka maalgelinta argagixisada.
Muddada uu socdo barnaamijkan wacyi gelinta iyo tababarka isugu jira ayaa lagu wadaagi doonaa macluuumaadyo muhiim ah oo ay kamid yihiin sharuucda dalka ee la-dagaalanka maal gelinta argagaxisada.
Mudane Cabdirisaaq Maxamuud Jaamac,wasiiru dowlaha maaliyadda Galmudug oo si rasmiga ah u furey tababarka ayaa sheegay in ka Galmudug ahaan ay ku faraxsan yihiin barnaamijkan, uuna muhiimad gaar ah u leeyahay maamulka.
Wasiirka ayaa sidoo kale sheegay fulinta barnaamijkan uu wax weyn katari doona amniga iyo kobaca dhaqaalaha gobolada maamulka Galmudug.
Xarunta Warbixinadda Maaliyadda, ayaa ah xarun u xilsaaran ka-hortaga lacag dhaqidda iyo la-dagaalanka maalgelinta argagixisada dalka, xarunta ayaa barnaamijkan ugu talo gashay adkeynta xiriirka iyo sare u qaadista qorshayaasha lagula dagaalamyo maalgelinta argagaxisada dalka.
Ugu dambeynti, Wasiiru dowlaha ayaa ka qeybgalayasha barnaamijkan kula dar daaramaya in ay si wanaagsan ugu faa’ideystaan isla markaana u dhabar adeegaan howlaha, istiraatiijiyada iyo hababka looga hortaga loolana dagaalamo gaalgelinta argagixisada, wasaaradda maaliyadda ayaa xarunta FRC ugu mahadceliyey qabashada barnaamijkan muhiimka ah.
