Weriye Cabdullaahi Maxamed Faarax oo ka tirsan shaqaalaha Radio Kulmiye ayaa lagu afduubtay magaalada Baraawe ee Gobolka Shabeellada Hoose, halkaas oo weriyuhu uu u tegay howlo shaqo, illaa hadana lama oga halka lala aaday.
Weriye Cabdullaahi ayaa waxaa lagala baxay Hotel uu ka deganaa bartamaha magaalada, waxaana ka xeysatay koox hubeysan oo ilaa hadda aan la aqoonsan cidda ay ka tirsanyihiin.
Weriyaal ku sugan Baraawe iyo xubno ka tirsan qoyska Wariyaha la qafaashay ayaa noo xaqiijiyey afduubka Weriyaha, waxaana socda dadaalo ay wadaan hey’adaha ammaanka ee magaalada Baraawe, maamulka Idaacadda Kulmiye iyo ehelka Weriyaha oo is-kaashanaya, si loo soo badbaadiyo Weriye Cabdullaahi Maxamed Faarax.
Muddooyinkii dambe waxaa jiray hanjabaado weriyaha uga imaanayey ururka Al-Shabaab, waxaana loo maleynayaa in kooxda afduubatay ay xiriir la leedahay Al-Shabaab.
