Xafiis qaabilsan xiriirka Shacabka iyo xildhibaanada siyaasadda ku matalaya ayaa maanta laga furay magaalada Cadaado.
Munaasabadda furitaanka xafiiskaasi ayaa waxaa ka qayb galay mas’uuliyiin ka tirsan dawlad goboleedka Galmudug iyo qaybaha kala duwan ee bulshada.
Abshir Maxamed Axmed “Abshir Bukhaari” oo ah mudane ka tirsan aqalka sare ee Soomaaliya oo lahaa fikradda aas aaska xafiiskan ayaa sheegay in tani ay qayb ka tahay xoojinta iskaashiga bulshada iyo dadka siyaasadda ku matala.
Xildhibaan Nadiif Maxamed Guuleed oo ka tirsan Baarlamanka Galmudug iyo Saadaq Daahir Mire wasiir ku xigeenka wasaaradda dhalinyarada iyo ciyaaraha Galmudug oo ugu horayn munaasabadda ka hadlay ayaa sheegay in Abshir Maxamed uu bilaabay waddo cusub oo mas’uuliyiinta shacabkoodu isku kaashan karaan.
Ka soo qayb galayaasha munaasabadda ayaa xafiiskan ku tilmaamay mid ahmiyad wayn leh, taas oo iskaashiga mas’uuliyiinta iyo shacabka mid waxtar leh ka dhigi karta.
