Wasiirka Caafimaadka Soomaaliya Fowsiya Abuukar Nuur oo ay wehliso madaxa hey’adda IOM u qaabilsan Soomaaliya Ewa Naqfi, ayaa maanta soo gaarey Magaalada Dhuusamareeb ee Caasimada Galmudug, iyagoo u yimid daah furka mashruuc mudo soo socday oo lagu hirgaliyay warshad soo saari doonta Oxygen-ta oo baahi wayn loo qabay taasi oo laga hirgaliyay Isbitaalka weyn ee Gobolka.
Wasiir Fowsiya iyo Mas’uuliyiinta IOM ayaa warbixin ku aadan warshadan iyo sida ay muhiimka ugu tahay reer Galmudug waxaa kaga waramey wasiirka Caafimaadka Galmudug Dr. Cabdiwali Cabdulaahi Jaamac isagoona sheegay in baahiweyn looqab.
Ewa Naqfi Madaxa IOM ee Soomaaliya ayaa is dul-taagtay in hirgalinta warshadani aysan kaliya muhiim u aheyn COVID-19 oo kaliya balse ay wax badan katari doonto bukaanada ay saameeyaan abaaraha, iyo colaadaha.
Wasiirka Caafimaadka Soomaaliya Fowsiya Abuukar Nuur ayaa munaasabada furitaanka ka balan qaaday in ay Galmudug kala shaqeyn doonaan sidii loo heli lahaa dad Soomaali ah oo warshadan iyo kuwa lamidka ah ka shaqeeya.
Wasiirka Caafimaadka Soomaaliya Fowsiya Abuukar Nuur oo dhowr saacadood ku sugnayd Dhuusamareeb ayaa sidoo kale ka qayb gashey oo shir guddoomisey shirka 3-biloodlaha ah ee iskuxirka mashaariicda Caafimaadka Galmudug oo ay ka qayb galeen hey’addaha ka shaqeeya Caafimaadka, iyadoo sidoo kale booqatay xarunta Wasaaradda Caafimaadka Galmudug oo loogu sameeyay soo dhaweyn iyo qado sharaf maamuuskeedu sareeyo.
