Xildhibaan Daahir Amiin Jeesoow oo ka mid ah mudanayaasha Baarlamaanka Soomaaliya oo ku sugan magaalada Beledweyne ayaa waxa uu ka hadlay howlgallada ciidamada dowladda ay ka wadaan qeybo ka mid ah Gobolka Hiiraan.
Xildhibaanka oo maanta soo gaaray magaalada Beledweyne ayaa waxaa uu sheegay in ujeedka socdaalka uu yahay sidii lagu dhiiri gelin lahaa ciidamada Gobolka ka wada xoraynta maleshiyaadka Al-Shabaab.
“Waxaan aad ula soconaa in magaalada maleeshiyaadkii ku soo dhawadeen waxaana rabnaa inaan howlgalada lagu ciribtirayo Nabad diidka aan dhiiri gelino, shacabka Gobolka waxaa dan ugu jirta in amnigooda sugtaan ciidamadana ay gacan siiyaan” ayuu yiri Xildhibaan Daahir Amiin Jeesow.
Xildhibaanka ayaa waxaa uu nasiib daro ku tilmaamay in magaalada Beledweyne iyo guud ahaan Gobolka Hiiraan aysan ka jirin isicmaalka lacagta shilin Soomaaliga ah, taasina ay dhibaato weyn ku qabaan shacabka, gaar ahan qoysaska danyarta ah.
“Waxaan rabnaa in aan ogaano xaaladda nololeed ee shacabka ku nool gobolka Hiiraan, nasiib daroweyn waaye in lacag goobo kale lagu soo sameeyay in ganacsatada ay keenaan magaalada, dadkiina lagu dhaco”. ayuu Xildhibaan Daahir Amiin Jeesow hadalkiisa ku daray.
Hadalka Xidhibaanka ayaa waxaa uu imaanayaa iyadoo Gobolka ay ka socdaan howlgallo ka dhan maleeshiyada Al-Shabaab.
