Mudanayaasha Golaha Shacabka ee Baarlamaanka Jamhuuriyadda Federaalka Soomaaliya ayaa maanta xarunta Golaha Shacabka ku yeeshay kalfadhiga shanaad kulankiisa 27-aad, waxaana shir guddoominayay Guddoomiye kuxigeenka labaad ee Golaha Shacabka Mudane Cabdullaahi Cumar Abshirow.
Guntanka ama Kooramka kulanka oo ku furmay 140-Xildhibaan,waxa uu Ajendihiisu ahaa Akhrinta sedaxaad iyo u codeynta Hindise Sharciyeedka Kaalmo Sharciyeedka Federaalka iyo dhameystirka Akhrinta koowaad ee Hindise Sharciyeedka Tacliinta Sare ee Qaranka, waxaana ugu horeyn Xildhibaannada ay u codeeyeen Hindise Sharciyeedka Kaalmo sharciyeedka Federaalka oo ay ogolaadeen 138-Xildhibaan, laba Xildhibaan ayaa ka aamustay, Xildhibaan diidayna ma jirin sida uu sheegay Guddoomiye kuxigeenka labaad ee Golaha Shacabka oo kulanka shir guddoominayay.
Wasiirka Wasaaradda Cadaaladda iyo Arrimaha Dastuurka ee Xukuumadda Federaalka Soomaaliya Mudane Xasan Macallin Maxamuud ayaa Xildhibaannada Golaha Shacabka uga mahadceliyay ansixinta Hindise sharciyeedka Kaalmo Sharciyeedka Federaalka.
Sidoo kale Xildhibaannada Golaha shacabka ayaa dhameystiray Akhrinta koowaad Ee Hindise-sharciyeedka Tacliinta Sare Ee Qaranka, waxaana qaar ka mid ah Xildhibaannada Golaha Shacabka ay suโaalo ku aadan hindise sharciyeedkan weydiiyeen Wasiiru-dowlaha Wasaaradda Waxbarashadda, Hidaha iyo Tacliinta Sare Nuura Mustaf Mukhtaar oo dhankeeda ka jawaabtay suโaalaha ay Xildhibaannada weydiiyeen.
Ugu dambeyn Guddoomiye kuxigeenka labaad ee Golaha Shacabka Mudane Cabdullaahi Cumar Abshirow oo kulanka soo xiray ayaa sheegay in Hindise Sharciyeedka Tacliinta Sare ee Qaranka lagu wareejiyay guddiga ku shaqada leh si usoo diyaariyo Akhrintiisa labaad dibna golaha uu ugu soo celiyaan si looga doodo.
