Mas’uuliyiinta Wasaaradda Xanaanada Xoolaha Dhirta iyo Daaqa Xukuumadda Federaalka Soomaaliya ayaa maanta si weyn u maamuusay maalinta dhirbeerista Qaranka Soomaaliyeed oo sanad walba la xuso maanta oo kale, waxeyna Wasaaradda oo fulineysa hindisaha Madaxweynaha ee ahaa in hay’adaha dowladda ay hormuud u noqdaan ka shaqeynta Qorshaha Qaran ee Soomaaliya Cagaaran ay munaasbadda kusoo bandhigtay qorsha howleedkeeda ay sida qaaska u xilsaarantahay ee ku aadan dhireynta dalka Iyo ka hortagga xaalufinta dhirta oo laga dhaxlo nabaad-guur xooggan oo saameyn weyn ku yeesha nolasha dadka iyo deegankaba.
Agaasimaha Guud ee Wasaaradda Xanaanada Xoolaha Dhirta iyo Daaqa Xukuumadda Federaalka Soomaaliya Maxamed Cumar Nuur ayaa xusay in yaga oo tixraacaya hindisaha Madaxweynaha Soomaaliya ee ah Soomaaliya Cagaaran ay ka shaqeyn doonaan dhireynta dalka.
Wasiiru-dowlaha Wasaaradda Shaqada iyo shaqaalaha mudane Yuusuf Maxamed Aadan ayaa xusay in loo baahanyahay in si wadajira loo ilaaliyo Dhirta, maadaama ay muhiim u tahay noolaha.
Wasiir ku-xigeenka Wasaaradda Xanaanada Xoolaha Dhirta iyo Daaqa Soomaaliya mudane Aadan Maxamed Cali oo munaasbadda soo xiray ayaa sheegay inuu qorshahoodu yahay inay sanadkan gudihiisa beeraan Hal milyan oo geed.
Ugu dambeyn Wasiir ku-xigeenka, Agaasimaha guud iyo agaasimo waaxeedyada Wasaaradda ayaa si ay maalintan u weyneeyaan waxey dhir beeris ku sameeyeyn qaar ka mid ah Jaamacadaha iyo degmooyinka Gobolka Banaadir iyo isla xaruunta Wasaaradda oo ay ku beereyn in ka badan toban kun oo geed.
