Kulankani lagu taageerayay Ra’isul wasaaraha Jamhuuriyadda Federaalka Soomaaliya Cumar C/rihiid Cali Sharmaarke ayaa maanta lagu qabtay magaalada Muqdisho, iyadoo ay soo qaban qaabiyeen kulankaasi mudanayaal ka tirtsan Baarlamaanka Soomaaliya, odayaal, waxgarad iyo siyaasiyiin ka soo jeeda gobolka Sanaag, waxaana ka qeyb galay qeybaha kale duwan ee Bulshada rayidka ah, iyo marti sharaf kale.
Kulanka ayaa intii uu socday dadkii ka hadlay waxa ay ku dheeraadeen ka sheekeynta muhiimadda ay leedahay in dadka Soomaaliyeed ay gacmaha is qabsadaan oo ay taageeraan Ra’isul wasaaraha cusub iyo Xukuumadda uu soo dhisi doono si loo gaaro horumar dhinac waliba leh.
Xildhibaan Saciid Daahir Bootaan oo ka mid ahaa xildhibaannadii kulanka soo qaban qaabiyay ayaa sheegay in si buuxda ay u taageersan yihiin magacaabista iyo ansixinta Ra’isul wasaare Cumar C/rishiid ayna ka rajeynayaan in waxqabad uu la yimaado, Alle ayuuna uga baryay in xilkaasi uu la garab galo.
Xildhibaan Xaaji Ismaaciil Maxamed oo isna ka mid ah xildhibaannada Baarlamaanka Soomaaliya ayaa isna muujiyay sida uu u taageersan yahay Ra’isul wasaaraha cusub, waxaana uu ugu baaqay dadka Soomaaliyeed in ay taageeraan Dowladnimada si dalka uu u gaaro himilooyinka uu hiigsanayo, waxaana dhinaca kale Ra’isul wasaaraha uu ugu baaqay in howlkarnimo uu la yimaado si dadka Soomaaliyeed uu ugu samata bixiyo dhibaatooyinkii soo daashaday.
