Madaxweynaha Jamhuriyadda Federaalka ee Soomaaliya Mudane Xasan Sheekh Maxamuud ayaa xaley xarunta madaxtooyada afur ugu sameeyay saraakiisha ciiddamada booliska ee gobollada dalka.
Madaxweynaha oo hadal ka jeediyay munaasabadda ayaa booliska ku adkeeyay inay si hufan qaranka ugu adeegaan, qeybna ka qaataan sidii looga gudbi lahaa marxaladdan adag ee lagu jiro.
“Booliska waa ciidanka ugu fac weyn dalkeena. Marxaladda haatan uu dalka ku sugan yahayna waxaa looga fadhiyaa inay kaalin weyn ka qaataan. Waxaan idin ku boorinayaa inaad sharciga ku dhaqankiisa horseed u noqotaan, isla markaana aad iska dhega tirtaan kuwa doonaya in sharciga la hareer maro. Waddankan si uu horumar u gaaro, waxaa uu u baahan yahay caddaalad, idinkuna kaalin weyn ayaad ku leedihiin sidii caddaaladda loo dhaqangelin lahaa,’’ ayuu yiri Madaxweynaha.
Madaxweynaha ayaa sheegay in muhiim ay tahay in la dhameystiro dhismaha qeybaha kala duwan ee booliska, si hawsha booliska ee ay u hayaan shacabka u noqoto mid dhameystiran, isagoo dhanka kalena farey taliska ciidanka booliska inuu diyaariyo jiil cusub oo dhalinyaro boolis ah oo mustaqbalka u adeega qaranka.
Madaxweynaha waxaa kale oo uu ammaan u jeediyay Taliyaha Booliska S/Gaas Maxamed Sheekh Xasan Xaamid, oo uu sheegay in muddadii gaabneyn ee u xilka hayey inuu wax badan ku soo kordhiyey ciidanka Booliska.
Saraakiishan booliska ee maamullada iyo gobollada kale ee dalka ayaa magaalada Muqdisho kaga qeybgalayey siminaar ku saabsan baahida booliska, iyagoo isla markaana si wadajir ah beesha caalamka ugu gudbiyey dokumenti mid ah oo qeexaya baahida booliska, tallaabadaas oo qeyb ka ah barnaamijka dowladda ee dib u dhiska iyo dib u habeynta booliska Soomaaliyeed.
