Aqoon isweydaarsigani oo ahaa mid looga hadlayay arrimo la xariira dhibaatooyinkii laga dhaxlay falalkii burcad badeednimada ahaa ee ka dhici jiray qaar ka mid ah dhul xabeedka dagmada Hobyo ee gobolka Mudug iyo sida la isaga kaashan karo ka hortagida falalka foosha xun ee burcad badeednimada haddii ay soo noqdaan ayaa waxaa ka qeyb galay mas’uuliyiinta maamulka dagmada Hobyo iyo 50 ruux oo ka mid ah bulshada ku nool degmada Hobyo.
waxaa furitaanka aqoon isweydaarsigani ka hadlay Dr Cumar Maxamuud Rooble (Suuri) oo ku hadlayay magaca hey’addaha DARYEEL Iyo SOSDA oo iyagu barnaamijkani fulintiisa iska kaashanayay wuxuuna sharaxaad ka bixiyay ujeedka uu salka ku hayo aqoonisweydaarsiga, isagoona sheegay inuu yahay mid looga gon leeyahay in la iska wareysto dhibaatooyinkii laga dhaxlay burcad badeeda iyo sida la isaga kaashan karo inaysan mar dambe falalkaasi ku soo noqan dagmada Hobyo maadaama degmadaasi ay ka mid ahaan jirtay dhul xeebeedka gobalka Mudug oo ay kooxaha burcad badeed ay ku xooganaayeen.
Maxamuud Maxamed Cawaale Gudoomiyaha Dagmada Hobyo oo isna madasha ka hadlay ayaa ka warbixiyay dadaalka ay u galeen ka maamul ahaan in degmada Hobyo xiligaani aysan ka jirin wax la yiraahdo burcad badeednimo wuxuuna xusay ineey ku timid iskaashi ay ka yeesheen maamulka Galmudug iyo Ciidamada la dagaalanka burcad badeed ee Nato Iyo Atlanta ee ku sugan xeebaha dalkeena soomaaliya.
Ugu dambeyn qaar ka mid ah ka qeyb galayaashii aqoon isweydaarsiga oo madasha ka hadlay kadib markii ay soo gaba gabowday kala aragti qaadashadii qodabadii looga hadlay aqoon isweydaarsiga ayaa sheegay in falalkii burcad badeednimada laga dhaxlay dhibaatooyin fara badan oo ay ka mid ahaayeen sida ay ka dhawaajiyeen dhaqaale bur bur kufsi dumista qoysas Soomaaliyeed dib u dhac waxbarsha la’aan iyo kuwa kale oo fara badan.
Ma’ahan markii u horeysay oo Hay’addaha DARYEEL IYO SOSDA ay u qabtaan bulshada degmada Hobyo barnaamijyo lagu wacyi galinayo maadaama shacabka degmada Hobyo iyo deegaanada ku dhow dhow ay ka mid yihiin bulshada soomaaliyeed ay saameeynta xoogani ku yeelatay falalkii foosha xumaa ee Burcad Badeednimada.
Sawir Qaade C/risaaq Maxamed Axmed Wariyaha Warbaahinta Qaranka Ee Mudug
