Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa magaalada Khartoum kulan kula yeeshay Madaxweyne Ku Xigeenka 1-aad ee Jamhuuriyadda Suudaan, Mudane Bakri Xassan Saalex.
Kulanka ayaa looga hadley qaabka loo dhaqan gelinayo heshiis ay maalintii Arbacada (13/04/2016) labada dal dhowaan ku gaareen magaalada Khartoum oo dhigayey in la abuuro guddi iskaashi oo heer wasiir ah.
Madaxweyne Xasan Sheekh Maxamuud ayaa uga mahad celiyay hoggaanka, shacabka iyo dowladda Suudaan sida ay u garab taagan yihiin Soomaaliya, isagoo xusay in iskaashigan cusub ee labada dal ay bilaabayaan u sare u qaadi doono xiriirkii qotada dheeraa ee horay uga dhexeeyay labada dhinac.
Madaxweyne Ku Xigeenka Suudaan, Mudane Saalex ayaa sheegay in Suudaan ay ku faraxsan tahay xiriirka wanaagsan ee labada dal ka dhexeeya, loona baahan yahay in la xoojiyo si loola jaanqaado isbedelada iyo caqabadaha ka jira caalamka
Kulankaasi kadib ayaa Madaxweyne Xasan Sheekh Maxamuud iyo wafdigiisa waxay ka ambabaxeen garoonka diyaaradaha ee magaalada Khartoum, markii ay dhameysteen booqashadii labada maalmood ahayd ee ay ku joogeen Suudaan.
Madaxweynaha iyo wafdigiisa waxaa sii sagootiyay Madaxweyne Ku –Xigeenka Koowaad ee ee Jamhuuriyadda Suudaan Mudane Bakri Hassan Saleh , wasiirro , mas’uuliyiin kale iyo danjiraha Soomaaliya u fadhiya Khartoum
