Gudoomiyaha Maxkamadda Racfaanka ee Gobolka Banaadir Dr Saalax Sheekh Ibraahim Dhiblaawe ayaa Maanta Booqday Xabsiga dhexe ee Xamar waxaana halkaasi kusoo dhaweeyey Taliyaha Ciidanka Asluubta Soomaaliyeed S/Gaas Bashiir Maxamed Jaamac , Taliyaha Xabsiga dhexe ee Xamar G/Sare Maxamed Xirsiile iyo Saraakiil kale oo ka tirsan Ciidanka Asluubta.
Mid mid ayuu usoo kormeeray Gudoomiyaha Maxkamadda Racfaanka qeybaha uu ka kooban yahay Xabsiga dhexe isagoona Xog wareystay Xukumanayaasha ku xiran Xabsiga dhexe ee Xamar si uu u ogaado hadii ay jiraan dad si qaldan loo xukumay lagana caawiyo in Racfaan ay qaataan .
Gudoomiyaha Maxkamadda Racfaanka ee Gobolka Banaadir Saalax Sheekh Ibraahim Dhiblaawe ayaa u sheegay Maxaabiistii uu la kulmay in uu ka caawin doonno sidii Racfaan ay u qaadan lahaayeen hadii ay jiraan Dhaliilo ay tabanayaan waxaana isaga iyo Taliyaha Ciidanka Asluubta Soomaaliyeed ay balan qaadeen in ay bixin doonaan Maxaabiis mudo u xiran Lacago loo heysto.
Gudoomiyaha ayaa Taliyaha Ciidanka Asluubta waxa uu ku amaanay sida uu isaga xil saaray islamarkaana Masuuliyad gaar ah isaga saaray Nolosha Maxaabiista Xabisga dhexe ee Xamar ku xiran waxaana uu bogaadiyey Howlaha Horumarineed ee ka socda Gudaha Xabsiga dhexe ee Xamar.
Ugu dambeyn Gudoomiyaha Maxkmadda Racfaanka Saalax Sheekh Ibraahim Dhiblaawe ayaa booqday Warshadda Farsamada iyo Tababarka Maxaabiista halkaasina waxa uu kusoo arkay Maxaabiis shaqeyneysa oo soo saareysa Agabyo kala duwan oo u badan qalab Xafiiseedka IWM .
