Naadiga saxaafadda Soomaaliyeed oo loogu talo galay isku xirka iyo wada shaqeynta warbaahinta waxa ay ka shaqeyn doontaa fuddeynta howlaha warbaahintu ay u heyso bulshada sida ay sheegeen madaxda Naadiga saxaafadda Soomaaliyeed.
Munaasabada dib loogu howlgalniyayey Naadiga Saxaafadda Soomaaliyeed waxaa ka qeyb galay xubno matalayey bahda warbaahinta, waxaana laga sheekeeyey faaiidada Naadiga Saxaafadda Soomaaliyeed uu u leeyahay qeybaha kala duwan ee warbaahinta Soomaalida.
Cali Xalane, oo xubin ka ah Ururo lamid ah Naadiga saxaafadda Soomaaliyeed ayaa ka sheekeeyey muhiimadaha uu u leeyahay warbaahinta Naadigan oo kale.
“Waxaa laga helaa faaiidooyin ay kamid yihiin dhinaca safarada, sababtoo hadii naadi la yaqaan aad xubin ka tahay tixgalin gaar ah ayad heleysaa”ayuu yiri Cali Xalane
Agaasimaha Wakaaladda Wararka Qaranka Soomaaliyeed ee SONNA C/raxmaan Yuusuf Sheekh Al-cadaala oo kamid ah wariyeyaashii wax kasoo bartay Naadiga Saxaafadda Soomaaliyeed ayaa talaabo wanaagsan ku tilmaamay dib u nooleynta Naadigan oo sida uu tilmaamay wax badan kusoo kordhin kara Saxaafada Soomaaliyeed.
“Runtii farxad ayey ii tahay inan maanta goob jog u ahaado dib u howlgalinta Naadiga Saxaafada Soomaaliyeed oo aan kamid ah dadkii kasoo farcamay ee wax kusoo bartay”Ayuu yiri agaasimaha SONNA.
Ustaada Yuusuf xasan Macalin oo gudoomiye ka ah Naadiga Saxaafada waxa uu sheegay in Naadigan uu saldhig u noqonayo wariyeyaasha, oo uu ka saacidayo fududeynta howlaha kala duwan ee ay u hayaan bulshada.
“Naadiga Saxaafadda Soomaaliyeed waxan ugu talo galnay in wariyeyaasha ay saldhig ama xarun u noqoto, waxey warbaahinta ka saacideysaa iney helaan cid kasta oo wareysi ay uga baahdaan, waxaa jiri doona isdiiwaan galin sanadkiiba mar wariyaha looga qaadayo lacag yar”ayuu yiri Ustaad Yuusuf Xasan.
