Wasiirka Caafimaaadka Dalka Masar ayaa sheegay in tirada dhimashada ee dadku ku dhintay doontii ku qallibantay badda Mediterranean-ka ee magaalada Rosetta ay gaarayaan 42-ruux
Sida ay ka soo xigatay Wakaaladda Wararka Masar, doontaasi qallibantay waxa ay sidday 600-lix boqol oo qof, kuwaas oo la tilmaamay In ay u kala dhasheen Dalalka Suuriya, Masar iyo kuwo kale oo Afrikaan ah.
Doonta qallibantay ayaa lagu waramay in ay ka soo shiraacatay agagaarka Kafr El-Sheikh,waxaana boliiska dalka Masar ay sheegeen in aysan garaneyn halkii ay ku socotay.
Shilkaasi oo dhacay shalay ayaa yimid laba cisho ka hor markii Madaxweynaha Dalkaasi Abdel-Fattah El-Sisi oo ka qeybgalay shirkii Qaramada Midoobay uu u sheegay madaxda Umadaha Midoobay in arrimaha la xiriira socdaalka qaxootiga ah laga dhigo ajeendaha ugu sarreeya ee leh mudnaanta koowaad.
Illaa iyo hadda ma cadda in dadkaasi ku waxyeeloobay doontaasi ay ku jiraan dad Soomaali ah ,waxaana lagu waramay in la badbaadiyay tiro badan oo ajaaniib ah.
