Hey’adda Culimada Soomaaliyeed ayaa Xildhibaanada Qaranka ugu baaqday in ay ilaaliyaan danta dadka Soomaaliyeed, isla markaana ay ka fogaadaan in doorashada la musuq maasuqo.
Guddoomiyaha Hey’adaas Sheekh Bashiir Axmed Salaad ayaa sheegay in Xildhibaannada looga baahanyahay inay si xilkasnimo leh ku gutaan amaanada ay qaadeen oo ay ka dhabeeyaan dhaartii ay Alle dartii u mareen.
“Isbadal ayay muujineysa in dadka muslimiinta ay madaxdooda doortan ayaa xaq u leh, waxaan soo jeedineynaa inay si nabad ah ku dhacdo oo ay ka faa’iideystaan fursadaan ayna doortaan hogaamiye dalkan wax u qaban kara oo fulin kara danta, dalka iyo Diinta, Xildhibaanada waxaan u rajeyneynaa inay gutaan waajibaadkooda Qaran ee ka saaran shacabka” ayuu yiri Sheekh Bashiir Axmed Salaad.
Guddoomiyaha Hay’adda Culimada Soomaaliyeed ayaa sheegay inay qorsheynayaan sidii ay uga qeyb geli lahaayeen hoolka ay ka dhaceyso doorashada Madaxweynaha Jamhuuriyadda, si ay hadalo dar daaran ah ugu jeediyaan Xildhibaannada, maadaama ay mas’uul ka saarantahay shacabka.
