Maamulka Degmada Xudur ee Gobolka Bakool ayaa bilaabay Olole ay ku nadiifinayaan kuna dhisayaan wadooyinkii Biyaha Roobka ay fariisteen xilli ay ka curteen Roobabkii guga guud ahaan Dalka.
Roobaabkaasi oo mudooyinkii dambe ku da’ayey Degaano ka tirsan Gobolka Bakool gaar ahaan Degmada Xuddur ayaa waxaa ay saameyn ku yeesheen Wadooyinka iyo Xaafadaha qaar ee Magaalada, iaydoona uu xakad galey isu socodkii gaadiidka iyo dadweynaha.
Maamulka Degmada Xuddur ayaa saaka dayactir ka bilaabay wadooyin muhiimka u ah Suuqa oo biyahaasi ay gooyeen waxayna ku shubayaan dhagxaan si Bulshadda ay ugu adeegato.
Cabdirisaag Isaak Saajin waa Guddoomiyaha Howlaha Guud iyo Dib u dhiska Degmada Xuddur ayaa baaq u direy Hay’adaha ka shaqeeya gudaha Magaalada Xuddur in ay gacan uga geystaan dib u hagaajinta Wadooyinka wuxuuna intaasi ku darey in kamaamul ahaan mar walba ay u taagan yihiin ka jawaabida baahiyaha Bulshadda walow aysan jirin kaabayaal dhaqaale oo wax ka soo gala wuxuna bulshadda ugu baaqey in ay bixiyaan Canshuurta si wax loogu qabto adeeqyada Caafimaadka, Waxbarashada iyo Dayactirka Wadooyinka.
