Guddoomiye ku-xigeenka Koowaad ee Aqalka Sare Dalka Abshir Maxamed Axmed iyo Wafdi uu hogaaminayo ayaa gaaray magaalada Cadaado ee xarunta Baarlamaanka Galmudug halkaasi oo ay ku soo dhaweeeyeen mas’uuliyiin ka tirsan Galmudug.
Qeybaha bulshada ayaa sidoo kale ka qeyb qaatay soo dhaweynta wafdiga Guddoomiye ku-xigeenka Koowaad ee Aqalka sare.
Guddoomiyaha Degmada Cadaado Cabdullaahi Cabdiraxmaan Tootole oo saxaafadda kula hadlay garoonka diyaaradaha ee Cadaado ayaa sheegay in ay aad ugu faraxsanyihiin soo dhaweynta ay maanta u sameeyeen wafdiga uu hogaaminayo Guddoomiye ku-xigeenka Aqalka sare ee dalka.
Guddoomiye ku-xigeenka Koowaad ee Aqalka Sare Dalka Abshir Maxamed Axmed ayaa sheegay in socdaalka uu ku tegay Cadaado ay qeyb ka tahay u kuur gelidda xaaladda magaalada, isagoo xusay uu halkaasi ka hirgelin doono Maktabad laga helo macluumaad badan oo dhanka aqoonta ah.
“Aad iyo aad ayaan ugu faraxsanahay inaan soo booqano magaalada Cadaado oo ka mid Galmudug, waxaan samey doonaa inta aan joogo Maktabad u furo degmada Cadaado, taasi oo noqoneyso maktabad guud oo ay dhallinyaradu ka heli doonaan keydkii aqoonta iyo taariikh”ayuu yiri Abshir Bukhaari.
Mudane Abshir Bukhaari ayaa horey magaalada Cadaado uga hirgeliyay mashaariic kala duwan oo ay ka faa’iideysteen qeybaha bulshada ee Degmada Cadaado ku nool.
