Dibad baxyaal Ciraaqiyiin ah ayaa dab qabadsiiyay Qunsuliyadda Iran ee ku taala magaalada Basra ee koofurta wadankaas, xilli ay xoogeysteen banaan baxyada looga soo hor jeedo musuq maasuqa iyo la’aanta adeegyada aas aasiga ah ee bulshada.
Tiro aad u badan oo banaan baxyaasha ah ayaa isugu soo aruurey waddooyinka magaalada ay ku badan yihiin Shiicada Ciraaq, kuwaas oo ku qeylinayay ereyo ka dhan ah faragelinta dowladda Iran ee siyaasadda wadanka Ciraaq.
Mudadii banaan baxyada hal qof ayaa dhintay 11 kalena waa la dhaawacay markii ciidanka amniga iyo dibad baxyaasha fara isula tageen.
Jimcihii ayay u aheyd maalintii shanaad oo magaalada labaad ee ugu weyn wadanka Ciraaq ee Basra ay ka dhacayeen bannaan baxyo rabshado wata, ugu yaraan 10 qof ayaa ku dhimatay shantaas beri.
Mas’uuliyiinta magaalada ayaa ku dhawaaqay bandow xilliga habeenkii ah magaalada Basra.
Iran, ayaa si weyn saameyn ugu leh guud ahaan gobolka Bariga dhexe gaar ahaan wadanka Ciraaq oo Shiicada ay yihiin kuwa ugu badan wadanka, kuwaas oo awooda wadanka heystay tan iyo Sadam Xuseen.
Afhayeen u hadlay wasaaradda arrimaha dibadda Iran, Bahram Qassemi, ayaa cambaareeyay weerarka lagu qaaday Qunsuliyadooda Basra.
Warbaahinta wadanka Iiraan ayaa soo warisay in dhammaan shaqaalaha laga saaray xarunta ka hor inta aan la soo weerarin.
Khamiistii, banaan baxyaasha waxaa ay sidoo kale gubeen xarumaha dowladda hoose ee magaalada Basra, oo ay ku jiraan xafiisyada siyaasiyiinta iyo dekada ugu weyn wadanka Ciraaq ee magaalada Basra.
Ra’isul wasaaraha dalka Ciraaq Haydar Al Cabaadi ayaa jimcihii sheegay in si deg deg ah loo sii deyn doono dhaqaalaha lagu kabayo adeegyada bulshada magaalada Basra.
Hoggaamiyaha Shiicada Ciraaq ugu sareeya, Ayatollah Ali Sistani, ayaa ku eedeeyay rabshadahan in ay ka dambeeyaan dad uu ku tilmaamay in ay dowladda ku cusubyihiin si ka duwan maamulkii hore.
Bannaan baxyada magaalada Basra ayaa bilowday markii la waayay shaqooyin, korontada iyo biyo nadiif ah isla markaana boqolaal ruux xarumaha caafimaadka la dhigay markii biyo wasakheysan cabbeen.
Dadka deegaanka ayaa dowladda ku eedeeyay musuq maasuq iyo wax qabad la’aan burburka dhammaan kaabiyaasha wax soo saarka shidaalka wadanka Ciraaq oo qani ku ah saliida.
