Ciidanka xoogga dalka, gaar ahaan Guutada 5aad ee Hiiraan ayaa wado howlgallo maleeshiyada Al shabaab looga saarayo deegaanada waqooyi ee gobolka Hiiraan.
Taliyaha Guutada 5-aad ee Ciidanka Xoogga dalka, Maxamuud Xasan Ibrahim oo warbaahinta la hadlay ayaa sheegay in deeganada ay howlgalada ka socdaan ay ka tirsan yihiin degmooyinka Matabaan iyo Maxaas ee gobolka Hiiraan.
Inta uu Howlgalka socday Ciidanka ayaa tagay degaano ay ka carareen maleeshiyada Al Shabaab markii ay maqleen dhaq dhaqaaqa Ciidanka xoogga dalka ee kusoo wajahan, deegaanada ay ciidanka tageen ayaa waxaa ka mid ah Coomaad iyo Madhooy oo hoostago Degmada Matabaan iyo degeenno kale, sidoo kale ciidamada xoogga dalka ayaa howlgallo ka sameeyay dhulka buuraha ah ee u dhaxeeya Beledweyne iyo Matabaan.
Howlgalada ciidanka ee gobolka Hiiraan ayaa imaanaya iyadoo mudooyinkan danbe ay Al- Shabaab ku howlanayeen in ay galaangal ku yeeshaan inta u dhaxayso gobalada Hiiraan iyo Galgaduud.
